OFW, gayyemna, nalmes iti karayan Banaoang

SANTA, Ilocos Sur – Dua ti nalmes bayat ti panaglalangoyda iti Karayan Abra a sakup daytoy nga ili idi malem ti Disiembre 18.

Nalmes da Rely Felix Tejero y Altanos, 42, naasawaan, OFW, ken ni Ryan Milanes y Balderama, 25, baro, agpada a residente iti Barangay Paing, Bantay, Ilocos Sur bayat ti panangpadasda a ballasiwen ti karayan ngem dida nabaelan gapu iti napigsa a koriente.

Nangisayangkat ti Philippine Coast Guard ken Maritime Group iti retrieval operation ket nasapulanda ti bangkay ni Tejero iti met laeng Abra river ngem iti sakupen ti Banaoang, Bantay, Ilocos Sur.

Iti pannakaisurat daytoy, di pay nabirokan ti bangkay ni Milanes.#