OFW migration desk, naaprobaran a maipasdek

VIGAN CITY – Inaprobaran ti sangguniang panlungsod ditoyiti sessionda idi Abril 11 ti maysa nga ordinansa a mangipasdek iti migrant desk para kadagiti Pilipino nga agtrabtrabaho iti ballasiw-taaw.

Babaen ti butos a 6-0, inaprobaran ti sangguniang panlungsodĀ  iti maikatlo ken pinal a pannakaibasana ti Draft Resolution No. 11-07 wenno ordinansa a mangipasdek iti Vigan City Overseas Filipino Workers Migrant Desk ditoy siudad.

Kangrunaan a puntiria ti nasao nga ordinansa ti pannakaipaay ti venue para iti madagdagus a pannakaipaay kadagiti overseas Filipino workers ken iti pamiliada dagiti programa ken serbisio ti Overseas Workers Welfare Administration.

Sagudayen ti nasao nga ordinansa nga indatag ni Konsehal Henry Formoso ti panangtuding ti mayor iti staff iti babaen ti Public Employment Service Officers a mangimaton iti OFW Migrant Desk.

Karaman dagiti pagrebbengan ti nasao a migrant desk ti panagpaayna a coordinating body para iti pannakaidur-as ti pagimbagan dagiti OFWs ken pamiliada ditoy siudad, ti masansan a pannakikoordinarna iti OWWAĀ  no nasken ti pannakaited dagiti programa ken serbisio ti ahensia, panangipaayna iti maiyannatup a tulong kadagiti OFWs ken ti pamiliada babaen dagiti madadaan a programa ken serbisio malaksid iti tulong nga aggapu manipud iti OWWA, ken idanonna a direkta dagiti OFWs ken dagiti pamiliada iti OWWA para kadagiti madadaan a programa ken serbisio a pakairamanan dagiti kaso a pakaseknan ti kasasaadda.

Kabayatanna, naipaima iti committee on finance ken barangay affairs ti draft resolution nga indatag ni Konsehal John Patrick Singson a mangsuporta iti Senate Bill 2578 a mangipaay iti P1,000 a monthly allowances kadagiti amin a barangay tanod ken pannakailatang iti pondo para iti daytoy ken iti pannakaited ti retirement benefits kadagiti punong barangay iti amin a miembro ti sangguniang barangay a nagserbi iti tallo a nagsasaganad a daras.

Sagudayen pay ti resolusion a bigbigen ti Liga ng mga Barangay ditoy siudad ti Seksion 2 ti Senate Bill 2578 a maximum a 10 barangay tanod ti maipaayan iti binulan nga alawans, ket no maaprobaran ti gakat, suportaranna ti maximum a 20 tanod a maikkan iti monthly allowance.#