OFW natakawan iti otel a nagtsek-inanda nga agassawa

STA. MARIA, Ilocos Sur – Nakurang a kagudua ti milion ti natakaw kadagiti agassawa a OFW a mapapati a naisayangkat bayat ti kairut ti turogda iti kuarto ti otel a nagtsek-inanda idi rabii ti Mayo 30.

Inreport ni Marilyn Directo a natakaw dagiti kuarta, pasaporte, ATM ken credit cards ken ID ti kabsatna a ni Dina Zingarelli y Dasalla iti mismo a kuartoda iti Casa de Romas Hotel a masarakan iti Barangay Poblacion Norte ditoy nga ili a mapapati a napasamak idi rabii ti Mayo 30 bayat a kainget ti turogda nga agassawa.

Iti pannakaisurat daytoy, awan pay ti suspetsa ti kapolisan a nangiwayat iti panagtakaw.

Ngem maysa a tawag ti naawat ti police station manipud iti maysa a Cristine Averil, residente iti Barangay Suso, Sta. Maria a nangipakaammuanna nga adda nakitana a bag a naikabil iti pagbasuraan a lata iti asideg ti balayda.

Dagus a nagturong dagiti polis ken ni Zingarelli iti nadakamat a lugar ket kinumpirmar ti biktima a bagna ti naibasura nga awanen dagiti doliar ken peso a kuartana.

Maysa nga anggulo a kitkitaen dagiti inbestigador no inside job ti napasamak a panagtakaw agsipud iti kalaka dagiti mannanakaw a nakastrek iti kuarto dagiti biktima iti nasao nga otel.

Segu  ken ni Dina Singarelli, 50, natibo iti Barangay Nalvo, Sta. Maria ngem umilin iti US ken nars nga agtrabtrabaho iti San Joaquin Gardens, Fresno, California, USA,  nagtsek-inda ken ni lakayna a Chris iti nasao nga otel idi agarup 8:15 ti sardam ti Mayo 27.

Idi agsapa ti Mayo 30, timmabuno dagiti dua iti wedding anniversary dagiti dadakkelna a naangay iti Barangay Nalvo ket agarup 10:00 ti rabiin iti dayta met la a petsa a nagsublida iti otel.

Kinuna ni Dina nga inkabilna ti bagna iti rabaw ti lamisaan sakbay a naturog ngem idi bimmangon iti agarup 9:30 ti bigat ti Mayo 31, naduktalanna nga awanen ti bagna a naglaon iti $10,000.00 (aganay a P450,000.00), P25,000.00, wedding ring, pasaporte, ATM ken Credit Card ken IDs a mapapati a kinurimes ti di nabigbig a mannanakaw.

Agtultuloy ti panagimbestiga dagiti polis mainaig iti daytoy a panagtakaw.#