Oil Deregulation Law, panawenen a marebio (Maudi iti dua a paset)

Kas nadakamaten itay nabiit,  dagus nga impakaammo ti maysa a dakkel a kompania ti lana ti panangimplementarda iti price hike iti mamindua iti makalawas agingga iti masulnitanda ti pukawda kuno iti panagpangato manen ti presio ti lana iti world market.

Umkis la ketdi manen dagiti protesta ti transport sektor mainaig iti daytoy. Ngem kas kapaliiwan iti kallabes, agtinnag laeng dagitoy a protesta kadagiti tuleng a lapayag.

Ngem saan a mabalin a barengbarengen nga adda kalintegan dagiti drayber ken operator dagiti bus ken dyip nga agprotesta iti daytoy a panggep dagiti dadakkel nga oil companies. Apay ketdin a saan? Basta, bumasbassit ti matgedanda iti inaldaw a panagpasadada gapu iti adu unayen a bilang dagiti lugan a pampasahero, ken iti nguminngina a presio dagiti spare parts, ad-adda manen a kumisang gapu iti dakdakkel a magastoda iti gasolina ken krudo.

Aniaman a kantidad a maikissay iti matgedanda gapu iti kanayonan a magastoda iti gasolina ken krudo, makaapektar iti aginaldaw a panagbiagda.

Iti sabali a bangir, adda naipasdek nga ahensia a mangkita koma iti pagimbagan ti publiko tapno saanda a mapadagsenan iti panagpangato ti presio ti produkto ti petroleo.

Daytoy ti Departamento ti Enerhia.

Pagrebbengan ti DoE a mangiwayat kadagiti wagas a mangbalanse iti interes dagiti grupo ti transportasion ken dagiti kompania ti lana.

Iti maysa a bangir, kasapulan ti balanse a panangtimbangna iti pakaseknan ti transport groups tapno saan a mapadagsenan dagitoy iti panagpangato ti presio ti gasolina ken krudo a dakkel a mangkittab iti masapulanda. Kinapudnona, idardarirag payen dagiti sumagmamano a lider ti grupo ti panangipangatoda iti plete agsipud iti kinangina ti presio ti gasolina ken krudo. Dagiti dadduma, ibalballaagda payen ti transport strike no saan a maitaltalek daytoy a problemada. No mapasamak dayta, sabali manen a buong ti ulo ti gobierno agsipud ta maapektaran ti riding public, nangruna dagiti estudiante, dagiti nagannak ken agop-opisina nga agluglugan kadagiti public utility vehicles.

Iti sabali a bangir, kasapulan a mangiwayat iti addang tapno saan nga agsasaganad ti panangipangato dagiti oil companies ti presio ti produkto ti petroleo no ngumina ti lana iti world market, kasta met a no agipangatoda man iti presio, daydiay maiyannatop ken rumbeng laeng a pakaipangatuanda. Masapul a kitaenna a saan a gundawayan dagitoy nga oil companies ti panagpangato ti presio ti lana iti sangalubongan tapno ad-adda pay a dumakkel ti mapastrekda.

Sangkakuna dagiti opisial ti DoE nga ar-aramidenda dagiti pagrebbenganda  a mangkontrol iti nakaro a panagpanganto ti presio dagiti produkto ti petroleo ditoy pagilian tapno maalay-ayan ti panagrigat dagiti umili, nangruna ti riding public ken dagiti transport sectors ngem saan a makapnek dagiti addang nga iwaywayatda.

Saan a mailibak nga agingga ita, bassit la a panagpangato ti presio ti lana iti merkado ti sangalubongan, dagus nga ipakat dagiti oil companies ti prike hikes. Saan kadi a kinabuklis daytoy idinto a nakalawlawag pay ngem agmatuon a nagatangda dagitoy a produkto sakbay ti panaggaraw ti presio ti lana? Kasta met laeng a no bimmaba ti presio ti lana iti sangalubongan, apay nga ingget bayag ti panangipakatda iti rollback? Uray saan a nakaadal ni Pedro, makuentana a dakkel latta ti maleksab dagiti oil companies agsipud ta ilakoda dagiti produktoda iti nangina idinto a nababbaba ti presio a pinanggatangdan.

Kaarig ti ragadi ti panagpastrek dagiti oil companies. Agpangato ti presio ti lana iti world market, agganansiada iti dagus a panangipakatda iti price hike. Agpababa man ti presio daytoy, kaskasdi a lumeksabda latta ta dida met ibaba a dagus ti presio nupay nababbaban ti panaggatangda iti world market.

Iti nalawag a pannao, bumbumsog dagiti oil companies idinto a kumkumriit latta ti boksit dagiti umili.  Kayariganda dagiti alimatek a kasta unay ti panagkunnotda iti dara dagiti umili.

Adda kadi pay maaramidan ti gobiernotayo?

Pangrugian: ukagenna dagiti libro dagiti oil companies. Saan man nga annugoten dagiti oil companies, dakkel ti mapaspastrekda agpangato man wenno agpababa ti presio ti lana iti world market.

Maikadua: baliwanna a kitaen ti Oil Deregulation Law tapno sullatanna dagiti abut a masuspetsa nga inggagara nga inabotan dagiti agilinlinteg a tuta dagiti oil companies tapno adda lumsotan dagitoy a manggundaway iti riding public ken ti transport sector!

Kas nakunamin, saan a ti ubbaw a pammasingked ti kayat a makita dagiti umili no di ti napigpigsa a determinasion ti gobierno a mangiwayat kadagiti natibker nga addang ken solusion tapno maalut-ot dagiti agnguy-an nga umili iti makapatay a kayetket dagiti gamrud ken buklis nga oil companies.

Iti daytoy a banag, saan a pikpik laeng iti abaga ti kasapulan no di aramid pakakitaan.#