Oil Deregulation Law, panawenen a marebio (Umuna a paset)

Komentario ni Tatang Lakay

Panawenen a marebio ti oil deregulation law agsipud iti di malapdan a panangipangato dagiti oil companies iti presio ti lana gapu kuno iti ingingina ti presio daytoy a produkto iti world market.

Itay la lawasna, impakaammo ti Shell ti panangimplementarna iti price hikes iti mamindua a daras iti makalawas tapno  tumulong kuno a mangalay-ay iti kidag ti nangatngato a presio ti lana iti publiko.

Ngem idi apagtapog ti Septiembre, nagdemanda ti sektor ti transportasion iti “one time big time rollback ti presio ti produkto ti petroleo gapu iti panagpababa ti presio ti lana iti internasional a merkado.

Yan ti rigatna, kinuna ketdin ti Departamento ti Enerhia a nakagalut dagiti imada agsipud ta kas intuding ti Oil Deregrulation Law, addaan iti pannakabalin dagiti oil companies a mangipangato iti presio ti petroleo kas maibatay iti world oil price.

Madakamat ditoy nga idi sakbay ti pannakaipasa ti Oil Deregulation Act idi 1998, adda impasdek ti gobierno Oil Price Stabilization Fund a mangalay-alay wenno mangkontrol iti panagpangato wenno panagpababa ti presio ti produkto ti petroleo kas panaggaraw ti presio ti lana iti world market.

Babaen ti OPSF, matellay ti panangipangato dagiti kompania ti lana ti presio ti produkto ti petroleo ta adda madadaan a pagkaudanda iti pondo a pangsulnit iti pukawda.

Ngem napaliiw a nagbalin laeng a milking cow dagiti kompania ti lana ti OPSF a madadaan a pagkaudanda iti pondo no kasdiay nga agpangato ti presio ti lana iti world market. Ngamin, napaliiw a no kasano kadarasda nga agiyaon iti pagsulnitda iti pukawda no kasdiay nga agpangato ti presio ti lana, kasta met ti kabuntogna a mangisubli iti nakaudda a pondo no kasdiay a bimmaba ti presio ti lana.

Daytoy ti kangrunaan a gapu no apay a nadaras a makarudkod ti pondo ti OPSF a nagbalin a dakkel a padagsen iti gobierno nasional agsipud ta kasapulan a mangilatang iti sabali manen a pondo para itoy.

Iti pannakaipasa ti Oil Deregulation Act of 1998, ninamnama dagiti agilinlinteg ti iseserrek dagiti ad-adu a players a mangited iti napingpinget a kompetision kadagiti dadakkel a kompania ti lana nga agtungpal iti pannakapukaw iti monopolia dagitoy iti presio ti produkto ti petroleo ditoy pagilian.

Ngem kapaliiwan  a nupay masigurado ti kaadda iti sierto a suplay ti produkto ti petroleo iti pagilian, saan a natungpal daytoy a puntiria dagiti agilinlinteg a nababbaba wenno maikanatad a presio agsipud ta awan met ti magudilan dagiti simrek a babassit a players iti pannakaidiktar iti presio ti produkto ti petroleo iti merkado.

Paglibakan la ketdi daytoy dagiti oil companies, ngem saan a malibak a no ania ti ikeddengda a price increase wenno rollback, adda laeng a sumursurot dagiti babassit a players.

Kasta met a no ngimmato ti presio ti lana iti world market, dagus nga ipangato dagiti oil companies ti presio ti produkto ti petroleo. Iti sabali a bangir,  no bimmaba ti presio ti lana, nabunbuntog pay ngem pagong ti panangipakatda iti rollback iti gasolina, diesel,   LPG wenno kerosene.

Yan ti rigatna, no agipangato dagiti oil companies  iti presio ti petroleum products, isaltekda iti nangatngato ngem iti mapattapatta a pagpangatuan koma ti presioda. Kasta met a no agipakatda iti price rollback, sangsangkadilmut met uray kasano ti panagprotesta ti publiko ken sektor ti transportasion.