“One Strike Policy” ti PNP kontra illegal a sugal; hepe ti polis, narelibo iti puestona

SAN FERNANDO CITY– Kas panangipakatna iti naing-inget a kampaniana maikontra iti hueteng, rinelibuan ti Police Regional Office (PRO1) ditoy ti maysa a hepe a polis iti Ilocos Sur kas panagtungpal iti one strike policy ti PNP mainaig iti kampania kontra anti-illegal gambling.

Kinuna ni Police Chief Superintendent Franklin Jesus B. Bucayu, PRO1 director, a kas panangipakat ti PRO1 iti naing-inget a kampania maikontra iti illegal a sugal ken panangiyunay-unay iti command responsibility, narelibo iti puestona ni Inspector Faustino C. Bandao, kas hepe ti polis ti Sta. Cruz, kalpasan ti pannakatiliw ti dua a lalaki nga agpappapusta iti hueteng iti area of responsibility ti opisial.

Nangiwayat ti nagtipon a grupo ti Regional Anti-Illegal Gambling Task Force, PRO1 ken ti Ilocos Sur Police Provincial Office iti anti-illegal gambling operation iti Barangay Paratong, Sta. Cruz, Ilocos Sur a nagtungpal iti pannakatiliw ni Marvin Aba Galinga, 35, naasawaan, ken residente iti Barangay Paratong, Sta. Cruz, Ilocos Sur, ken Jerry Abella Mariano, 37, naasawaan, ken residente iti Barangay Villa Garcia iti met laeng nasao nga ili.

Inaresto dagiti operating police team dagiti suspek bayat ti panagkolektada kadagiti pusta iti hueteng kadagiti nadakamat a barangay.

Nakakumpiska dagiti polis manipud iti ikut dagiti suspek iti kuarta, papelitos, selpon ken dadduma pay a banag a maus-usar kas paraphernalia ti hueteng.

Naipresentan dagiti naaresto a kobrador ti hueteng iti opisina ti provincial prosecutor para iti inquest proceedings a nai-docket iti babaen ti I. S. No. I-03-INQ-12K-00124 maikontra ken ni  Galinga ken I.S. No. I-03-INQ-12K-00125 maikontra ken Mariano gapu iti panaglabsingda iti RA 9287 wenno Revised Anti-Illegal Gambling Law.

Kinuna ni Bucayu a gapu iti daytoy, narelibo ni Police Chief Inspector Faustino C. Bandao, kas hepe ti polis ti Sta. Cruz, kas panagtungpal iti “One Strike Policy” ti PNP mainaig iti kampania maikontra iti illegal a sugal.

“Police commanders are held responsible in their area of responsibilities so they must make moves to eradicate all forms of illegal gambling particularly jueteng,” kinuna ni Bucayu.

Imminget ti kampania ti PRO1 maikontra iti hueteng babaen ti Implementing Plan 34-2012 ti PNP National Headquarters revitalized campaign against illegal gambling.#