Footer

Operation dagiti heavy equipment, nairugi a maisuro iti ISCC

BANTAY, Ilocos Sur -Mairugin a maisuro ti heavy equipment operation kas iti backhoe, loader ken motor grader iti Ilocos Sur Community College ditoy babaen ti pannakikammayet ti Technical Education Skills Development Authority babaen ti Technical Vocational Education Training (TVET) Program ti ahensia.

Pormal a nailukat itay Nobiembre 17 ti nasao a programa a maysa kadagiti component ti Development of Skills thru Vocational and Technical Education for Barangay Program and Self Sustainability (DVBS).

Kinuna ni Gov. Deogracias Victor “DV” Savellano a sinerrek ti ISCC ti vocational program gapu ta kasapulan unay dagiti heavy equipment operators saan laeng nga iti pagilian no di pay iti ballasiw-taaw.

Agdagup iti 23 iti umuna a batch ti kurso a pakaibilangan ti 13 nga inisial a nakaenrol iti backhoe operation ken 10 iti motor grader.

Dagus a maaddaan iti trabaho dagiti makalpas isu a dakkel ti maipaayna daytoy kadagiti kaprobinsiaan aglalo kadagiti out of school youth,” kinuna ti gobernador.

Kinuna met ni Joel Pilotin ti TESDA a ti ISCC ti kaunaan a maaddaan iti kastoy a programa pati payen iti pannakaisuro ti Mandarin Chinese iti sibubukel a probinsia.

Apaman a malpas ti 300 hours training, dumalanto iti competency assessment dagiti estudiante tapno makita no adda met laeng nasursuro dagitoy,” kinuna ni Pilotin

Kabayatanna, inyawat ni Chinese Consul Chen Lai Ping ti sumagmamano a computer sets ken liblibro para iti ISCC.

Kinuna ti consul a makatulong ti kaadda ti dua a Chinese teachers iti ISCC iti nadardaras a pannakasursuro dagiti estudiante iti Mandarin Chinese, ti pagsasao ti aganay 1.3 billion a Chinese iti lubong.

Umad-adun dagiti Filipino a mapmapan iti China isu a maysa a wise move para ken ni Gov. Savellano ti panagayabna iti Chinese a mangisuro ditoy,” innayon pay ti consul.#