Operation Green Gold, naipakat

CERVANTES, Ilocos Sur – Maysa nga operation ti insayangkat ti kapolisan iti nasulinek a paset ti kabambantayan ditoy nga ili idi Hulio 31 a nagresulta iti pannakapag-ot dagiti mula a marihuana.

Iti report manipud iti police station ti Cervantes a napetsaan Agosto 2, nangiwayat iti marijuana eradication dagiti nagtitipon nga elemento ti kapolisan a pakaibilangan ti Cervantes Municipal Police Station, Regional Public Safety Battalion 1, Ilocos Sur Provincial Public Safety Company, Suyo MPS ken ISPAIDSOTG iti pannakikoordinar ti PDEA RO1 sadiay Barangay Dinwende West, Cervantes, Ilocos Sur.

Pinag-ot dagiti tropa ti agdagup iti 220,000 a fully grown marijuana plants a matartaraken iti aganay 2.2 ektaria iti Sitio Toking ken Agaki, agpada a sakup ti Barangay Dinwende West, Cervantes.

Naipan dagiti napag-ot a mula a marihuana a mapattapatta nga agbalor iti P44 milion iti Cervantes, Ilocos Sur.

Segun pay iti report, maysa a polis a naka-assigned iti Ilocos Sur Provincial Public Safety Company, ti nadunor bayat ti operasion.

Naammuan nga aksidente a nakaruskos ni PO1 Ronald Madayog Tangalin a puon ti pannakadunor ti makannigid a takiagna ket naipan iti Southern Ilocos Hospital, Tagudin, Ilocos Sur para iti pannakaagasna, sa naiyalis iti ITRMC, San Fernando City, La Union.#