OPINION: Agsasallupang nga anunsio, lunod kadagiti agbuybuya

Iti kaudian a pannakiboksing ni Manny Pacquiao, nagpatingga laeng ti pannakirinnangasna iti ring iti dua a rikos. Sangapulo ket dua a rikos ti panagrupakda koma ken ni Ricky Hatton para iti light welterweight crown ngem na-knock out metten ti Briton iti tartaraudi a segundo iti maikadua a rikos.

Iti 12 rounds nga awan ti komersial, agpatingga laeng ti rupak iti 36 minutos. Iti sabali a bangir, kadawyan a tallo agingga iti lima nga oras ti gatangen ti kompania a pannakaipabuya iti rupak ket iti las-ud dagita nga oras a maibalballaet dagiti anunsio. Kas negosio, kasapulan dagiti anunsio tapno adda mapastrek ti kompania iti pannakaipabuya ti pannakirupak ni Pacquiao wenno iti aniaman a mapadpadaanan a boxing bouts iti dua a nalatak a boksingero.

Ngem dua met laeng a rikus wenno 6 a minutos ti nagbayagan ni Hatton. Nagbalin la ketdi ngarud a sakit ti ulo dagiti nakaitedan ti pammalubos a mangipabuya iti nasao a rupak da Pacquiao ken Hatton no kasano nga ipanapanda dagiti anunsio iti rupak a naggibus iti uneg ti innem a minutos laeng idinto a mano nga oras koma a mai-ere.

Awan ti sabali a solusion no di ti pannakaiballaballaet dagiti agsasaruno nga anunsio manipud iti iruruar da Pacquiao ken Hatton iti quartersda, ti ingangatoda iti ring, ti pannakakanta ti Nailian a Kanta ti dua a pagilian, ti panakaiwaragawag ti panangrugi ti laban ken pannakaiparang dagiti highlights ti rupak ken iti pannakaulit-ulit umuna ken maikadua a rikos.

Tapno maiyabot ti boxing bout iti nagatang a kapautna iti ere, naiparang pay iti slow motion dagiti highlights ti dua a rikos no sadino a natumba ni Hatton iti namindua iti first round ken na-knock out iti second round.

Gapu ta agkurang pay ti oras, kapilitan a nai-replay manen dagiti dua a rikos a naballaballaetan kadagiti agsasallupang nga anunsio.

Kaarigna, nagsagaba iti kalbario dagiti tattao iti panagan-anusda kadagiti agsasallupang nga anunsio dagiti nadumaduma a kompania a mangibambando kadagiti produktoda sakbay ti apagbiit a pannakaipabuya iti rupak nga agatiddog laeng iti innem a minutos. Adu a semsem ken tabbaaw ti nagasut iti bibig dagiti ordinario a tattao kadagitoy nga anunsio a kapilitan met ngarud nga ibturanda ta dida met kabaelan ti mapan agbuya kadagiti pagsinean ken dadduma pay a pagpabuyaan gapu iti kinangina ti bayad.

Sumangkautro, karaman kadagiti anunsio dagiti agtuturay a mangipaspasindayaw iti nagapuanan ti opisina nga idauluanda, ngem pagduaduaan met no sadino ti naggapuan iti kuarta a pinangbayadda iti pannakaipatangatang iti anunsioda idinto nga ipetpettengda a saan a nagtaud iti pondo ti opisinada.

Ita, maysa nga agilinlinteg ti nangipila iti gakat a mangtimbeng iti kinaadu dagiti anunsio a maipabuya iti maysa a programa. Pagduaduaanmi no makalusot daytoy iti pagpandayan-linteg agsipud ta dakkel a negosio ti maapektaran iti daytoy a gakat.

Kayatmi nga isingasing a maipabuya aminen dagiti anunsio sakbay ti panangrugi ti programa wenno sitcom ket tuloytuloyen ti panagbuya kalpasanna. Ngem itulok ketdin dagiti agtuturay iti telebision ken dagiti pasdek-negosio ti kasta? Sigurado la ketdi a bayat ti pannakaipatangatang dagiti anunsio, awan ti tao iti sango ti telebision, ta mapanda pay agobra wenno umisbo ket sadanto laengen agsubli inton maiwakas aminen dagiti anunsio.

Ngem nabileg dagiti negosio a mangidiktar iti pannakaipabuya dagiti produktoda. Anusan ngarud piman ni marigrigat nga agbuybuya ti agibtur iti semsem ken tumanabbaaw iti kaadu dagiti anunsio nga ipamalamal dagiti higante nga negosio a mangbibiag kadagiti telebision.#