OPINION. Marginalized a mangngalap, mannalon, rumbeng laeng a matulonganda

Daytoy ti kangrunaan a gapu no apay a supiaten dagiti adda puestoda iti tiendaan nga aglaklako iti nateng, ikan ken prutas: mabugawanda iti malakuan iti aldaw ti Mierkoles.

Wen met ngamin ta asino pay ti umuli iti maikadua a kadsaaran a yan ti puestoda no adda dagiti lako a natnateng ken ikan iti baba ken mabalin a nalaklaka nga amang ngem dagiti lakoda agsipud ta saanda nga agentrada a kas kadakuada?

Wen met ngamin, agbaybayad dagiti natengan ken ikanan iti binulan iti puestoda, malaksid iti permitda iti tinawen, santo mapalubosan ti maysa a grupo dagiti agindeg ditoy nga aglako iti tiendaan nga awan ti entradada? Saanen a patas dayta kadagiti negosiante nga addaan puesto iti tiendaan.

Ngem iyunay-unaymi ditoy a maysa met la nga aldaw iti makalawas ti panaglako dagiti marginalized farmers ken mangngalap kadagiti produktoda wenno makalapanda. Ken saan a makuna a dakkel a bulto dagiti ilakoda agsipud ta dagiti met laeng produktoda iti parparaangan wenno iti likudan ti balayda ken iti met laeng sobra iti mabanniitan wenno makalapanda a para iti pamiliada ti ilakoda iti tiendaan publiko.

Maibilang laeng dagitoy a “labba-labba” a tagilako a pangnayon iti pamastrekan dagitoy a babassitan a kailiantayo a mannalon ken mangngalap. Makunami a saan a maapektaran ti negosio dagiti addaan iti puesto iti tiendaan ta iti panagkunami, di pay maorasan iti tiendaan, maibbusen dagiti lakoda nga ikan wenno nateng.

Sabali pay a pangkontraan dagiti adda puestona ti panagbalin a narugit ti paset ti tiendaan a maituding a paglakuan dagiti marginalized farmers ken fishermen. Awan makitami ditoy a problema maipanggep iti panagdalus iti dayta a lugar agsipud ta mamatikami a manakem met dagiti mapan aglako a mangdalus iti lugar a paglakuanda sakbay a pumanawda babaen ti panangkita ken panangiwanwan dagiti para dalus iti tiendaan. Disiplina laeng ti kasapulan a maipaganetget kadakuada ket mamatikami nga agtungpalda a sitatallugod.

Ti ketdi koma siputan dagiti aglaklako nga addaan puesto iti tiendaan ti pannakaiwayat dagiti guidelines tapno dagiti laeng pudpudno a marginalized farmers ken fishermen ti mapalubosan nga aglako iti tiendaan. Daytoy ti makitami a grey area a posible a maabuso no awan ti guidelines a mangibaga no asino dagiti marginalized farmers ken fishermen. Uray ita, maysa nga addaan puesto ti nagkuna nga umanamong iti kaadda iti aldaw a panaglako dagiti marginalized farmers ken fishermen ngem masapul a bumabada nga aglako. Kadakami, maysa daytoy a panglikaw iti pudpudno a panggep ti gakat a mangtulong kadagiti babasssitan a mangngalap ken mannalon.

Rebbengna nga agkaykaysa dagiti konsehal a mangaprobar iti nasao a resolusion agsipud iti makitami a dakkel a maitulongna para kadagiti babassitan a kailiantayo a mannalon ken mangngalap.

Saan koma a padiktaran wenno painaknakeman dagiti konsehal iti grupo dagiti natengan ken ikanan iti tiendaan a maibilang a maysa a napigsa a puersa a mabalin a mangbaliktad wenno mangital-o iti panagtarigagayda manen a papili iti masungad nga eleksion. Saan koma nga aramaten dagiti konsehal a papogi points ti panangisakitda kadagiti adda puestona iti tiendaan nga aglaklako iti nateng, ikan ken prutas. Ti ketdi koma interes dagiti babassitan a mangngalap ken mannalon ti kitaenda a saan ketdi a ti interes dagiti ikanan ken natengan.

Kasapulan dagitoy ti pannuporta tapno adda pangsilpoda iti pagbiagda. Apay ketdin nga ipaidam dagiti konsehal daytoy a gundaway a manayonan met ti pamastrekan dagiti marginalized farmers ken fishermen?#