OPINION: Marginalized a mannalon ken mangngalap iti Vigan City, rumbeng laeng a matulonganda

Dakkel a makatulong kadagiti sangkasapulan-sangkaapuyan a mannalon ken mangngalap ti resolusion ni Konsehal Everin Molina a mangituding iti maysa nga aldaw a panaglakoda iti tiendaan a publiko ditoy siudad ti Vigan nga awan ti entradada wenno saan a matiketan ti lakoda no maiserrek iti tiendaan.

Ngem ita pay laeng, impeksan dagiti aglaklako iti ikan, nateng ken prutas nga addaan iti puesto iti tiendaan a kontraenda ti pannakaituding ti maysa nga aldaw tunggal lawas a panaglako dagiti marginalized a mannalon ken mangngalap iti apitda wenno makalapanda iti public market.

Iti panangangay ti dua a komite, ti committee on agriculture ken ti committee on market and slaughterhouse iti public hearing mainaig iti nasao a resolusion, no apay ketdi a saan a napaayaban dagiti aglaklako iti ikan, nateng ken prutas nga adda puestoda iti tiendaan. Mabalin a nagaripapa dagiti konsehal iti posible a nakaro nga isusupiat dagitoy iti nasao a resolusion nga agtungpal iti saanna nga ilulusot a mairekomenda para iti pannakatratarna iti sangguniang bayan. Daytoy ti dakkel a biddut dagiti dadaulo dagiti dua a komite agsipud ta iti saan a pannakaayab dagiti vegetable ken meat vendors iti public hearing ti pagkaptandan a mangiballaag iti idadatagda iti city hall kas panangipaduyakyakda iti protestada iti saanda a pannakaitaltalek iti maysa a gakat a pakaseknanda unay.

Pagsayaatanna ta iti baet ti kunana a procedural flaw, pimmabor ni Vice Mayor Franz Ranches kadagiti bimmutos a matrataren ti nasao a resolusion iti sumaruno a session ti sangguniang panlungsod a saanen a maisayangkat pay ti sabali a hearing.

Posible a bayat ti pannakatratar ti nasao a resolusion, agtignay ti gunglo dagiti aglaklako iti nateng, ikan ken prutas tapno malapdan ti pannakaited kadagiti marginalized a mannalon ken mangngalap iti maysa nga aldaw a panaglakoda iti tiendaan publiko a saanda nga agentrada. Sapay koma ta di agkirem dagiti konsehal no agprotestada a kas imballaag ti maysa nga opisial ti gunglo ti natengan ken prutas.

Adda ngaminen kapaliiwantayo a nabileg ti grupo dagiti aglaklako iti tiendaan ditoy siudad.

Iti napalabas, nakitatayo ti maysa a grupo iti tiendaan, ti grupo dagiti aglaklako iti karne ti baboy, a nangingato lattan iti presioda iti lakoda a baboy iti baet a maad-adal pay laeng iti sangguniang panlungsod ti petisionda a maysa a panaglabsing iti linteg. Ngem imbes a madusa ti grupo, pinatgan a dagus ti konseho ti siudad ti petisionda a mangingato iti presio ti lakoda a baboy.

Posible a no agtignay dagiti aglaklako iti nateng, ikan ken prutas maikontra iti resolusion ni Konsehal Molina, agpangadua manen ti panunot dagiti kameng ti konseho a mangituloy iti pannakaaprobar iti daytoy. Sapay koma ta saan.

Iti maysa nga interbio ti maysa nga opisial ti gunglo dagiti natengan iti tiendaan publiko iti maysa a radio station, imbaskagna a supiatenda ti panaglako dagiti marginalized farmers ken fishermen iti public market agsipud ta bumassit la ketdi ti paglakuanda iti aldaw ti Mierkoles nga ituding ti resolusion a market day para kadagitoy mannalon ken mangngalap.

(Adda tuloyna)