Footer

OPINION: Nagbuntog a Proseso

Maladingitankami unay iti super buntog a pannakatarimaan dagiti siled-eskuelaan wenno pannakasukat kadagiti nadadael a building gapu iti dimmalapus a bagyo nangruna la unay kadagiti eskuelaan iti makinlaud a paset ti Pangasinan. Saanmi a maawatan no apay a naginad unay ti proseso. Saandakami ngarud a mababalaw no kritikarenmi ti nabuntog a pannakaileppas kadagitoy a pasdek nangruna ket panagbabasa manen.

Lalo a saanmi a maawatan nga itoy a panagseserrek dagiti ubbing, iti sirok ti kayo ti pagbasaanda, iti uneg ti kapilia, wenno agkalubbon ti dua a klase iti uneg ti bassit a kuarto, ken uray sadino ditan a lugar a pagkuartoanda.

Nabuyami iti telebision nga adda pay sibubukel nga eskuelaan a saanen a mabalin a pagadalan agsipud ta naitayab dagiti atep dagiti pasdek, wenno narban dagiti didingna ngem an-anusan dagiti ubbing a pagklasean agsipud ta awan ti sabali a pagkuartoanda.

Makunami a saanen a maikanatad daytoy a mapaspasamak,. Saanen a makaited iti pammaregta nga agadal dagiti ubbing. Saanen a makaited iti inspirasion ken manggutugot kadagiti ubbing a lalo pay nga igaedda ti agiskuela ken agadal.

Inrekomendar ti United Nations Educational, Scientific and Cultural Organization (UNESCO) a masapul a maaddaan laeng koma ti maysa a kuarto iti ratio a 1:25-30 wenno duapulo ket lima agingga iti tallopulo nga estudiante ti agbasa iti tunggal kuarto. Ngem iti mapaspasamak, saanen a masurot daytoy ta agkurkurangen dagiti kuarto. Isu a makumi a saanen a conducive to learning daytoy a situasion.

Kasano koma a maigaed dagiti ubing ti agiskuela? Kasano pay a maay-ayo dagiti ubbing no awan uray tugawda wenno pangiparabawanda iti papel a pagsuratanda? Siempre, maipasngay ditan ti ngayemngemda. Aglaladutdan a sumrek. Saandan a maiyulo ti isursuro ti titserda. Santo pay nakaar-arimbangaw ti kaapiringda a kuarto a makaigapu iti pannakasingada ken saanda a pannakaikonsentret iti isursuro ti titserda.

Adda koma alternatibo a sistema wenno bayat ti pannakaur-uray a maproseso dagiti dokumento iti panangpabaro kadagiti building wenno classrooms, adda dagiti pangremedioan a measures tapno masulnitan dagiti pagkurangan.

Kas iti pannakaammomi, addaan ti DepEd iti P3.5 billion a budget para laeng iti pannakaipasdek dagiti building ken pannakatarimaan dagiti nadadael a classrooms. Agdagup iti P158.2 billion ti budgetna iti daytoy a tawen 2009. Nupay makuna a bassit laeng ti budget a nailatang para iti pannakatarimaan, pannakabangon kadagiti klasrom, rumbeng laeng koma a maiprioridad dagiti lugar a dinalapus ti bagyo, nangruna kadagiti lugar a nasulinek ken narigat ti lugan lalo no tiempo ti matutudo.

Saan koma a dagiti agbasbasa nga ubbing ti agsagaba gapu iti pannakabaybay-a. Saan koma nga ipalubos a mas lalo pay a dumakkel ti bilang dagiti saan nga agis-iskuela nga ubbing gapu laeng iti kinaawan ti siled nga inda pagsursuruan.

Laglagipen a dagiti ubbing ti sumaruno a lider iti pagilian ket nasken a mamulida iti nasayaat nga adal ken sursuro.#