Footer

OPINION: Pinoy a nangpeke iti kredensialna, dakes nga imahe ti impaayna

Nakaaramid la ketdi iti saan a nasayaat nga impresion iti nursing community iti panagpammarang ti maysa a Filipino a kas maysa a nars sadiay Canada babaen ti ‘panang-doktorna’ kadagiti papelesna. Iti daytoy nga inaramidna, agsagrap la ketdi iti nakair-irut a proseso ken panagamiris ken alienation kadagiti Pinoy a narses ken dagiti agpanggep a mapan agtrabaho sadiay. Makunami a dakkel a lilibeg ti pinarnuay daytoy agsipud ta mapingasan la ketdi iti panagtalek ti Canada ken sabsabali a nasion kadagiti Pinoy a narses gapu itoy nga aramid a maibilang a panagkusit ken aramid a saan a nanakman ken saan a nainpropesionalan a panggep ken ingpen.

Kadagiti sumarsaruno a narses a mapan iti Canada, saandan a namnamaen ti nalukay a panangsukimat kadagiti papelesda no di ket nakair-irut a panangusisa a mangpabayag iti pannagna iti proseso a mabalin a mangipaay iti panagalangan ti employer a mangiyemplo iti maysa nga aplikante a Pinoy a nars.

Iti panangannugot ni Edwin Canseco iti basolna,  sinentensiaan ti korte ti Winnipeg a naglabsing iti Manitoba’s Registered Nurses Act gapu iti panangpalsipikana iti kredensialna ket minultana iti 3,000 Canadian dollars.

Ngem iti panangaminna iti basolna ket saan nga umanay a mangugas iti inaramidna agsipud ta saan laeng nga iti bukodna a bagi ti maapektaran no di pay dagiti kailianna nga agpanggep met a mapan agtrabaho iti Canada ken iti sabali a pagilian. Ta adda la ketdi dayta impression nga amangan no saan manen a kualipikado a nars ti aplikante a Pinoy. Agtalinaed nga agtalinaed ti mantsa. Saanen a maikkat dayta nga  panangipapan kalpasan ti insidente.

Segun iti report ni Mike McIntyre ti Winnipeg Free Press idi Agosto 16, naamiris ti korte iti pannakaadda iti dakkel a panagbalbaliw kalpasan kadaytoy nga insidente tapno saanton a maulit pay iti masakbayan ken kasapulanen a masirip a nalaing ti background ti asinoman nga aplikante a nars, lalo iti nagtrabahuan ni Canseco, ti Seven Oaks Hospital (a namulta met iti sanga-ribu a doliar kas employer). Dakkel ti epekto daytoy a panagbalbaliw saan laeng iti sibubukel a Canada no di pay iti lubong.

Maysa a graduado iti Bachelor of Science in Nursing iti Galang Medical College idi 1992, nagadal pay ni Canseco sadiay Red River College tapno kualipikado nga ageksamen ken makapagtrabaho ngem namindua a saanna a naipasa ti licensure exam para narses. Iti panagaplikarna iti maysa nga ospital iti Canada, dinoktorna dagiti photocopy a papeles. .

Malagipmi la ket ngarud ti nakaro a panagprotestatayo idi naipabuya ti maysa a tv series a kinuna ti maysa a karakter a babai a dina kayat ti agpaamiris iti maysa a doktor a Pinoy agsipud ta pagduaduaanna dagiti kredensialna agsipud iti kinalaka ti panagpalsipika kadagiti dokumento iti pagilian.

Adu a kailiantayo ti nangkondenar iti nasao a pabuya gapu iti impaayna a dakes nga imahe kadagiti doktor a Pinoy.

Imbandotayo pay a saan a paatiw ni Pinoy a propesional iti panangipatungpalna iti pagrebbenganna, saan ket a kas iti nababa nga imahe nga impaduyakyak ti nasao a tv series.

Itangtangsittayo ti kabaelantayo a kas propesional nga agtrabaho iti ganggannaet a pagilian.

Sa ita, naibando iti sangalubongan ti maysa a kailiantayo a nangpalsipika iti papelesna tapno laeng makastrek a kas nars iti Canada. Maysa daytoy a dakkel a pakaibabainan dagiti amin a trabahador a Pinoy ken  dagiti agpanggep a sumrek iti trabaho iti sabali a pagilian.

Ti kunami, kadagiti kakastoy a bambanag, saan koma a pagtignayen ti aplikante a kailiantayo ti bukodna nga interes no di panunotenna ti takderna a kas professional ken takder dagiti kakabsatna iti trabaho, aglalo ti imahen ti pagilianna a kas maysa a pagtaudan iti narses iti sangalubongan.

Tumulong koma ni kailian a nars a mangiliklik iti imahe ni Pinoy a mailamina iti kambas ti lubong a kas maysa a manangallilaw ken managkusit.      

Ti biddut ket biddut. Mangnamnamakami a saan koman a maulit pay daytoy ta saan a makatulong iti dur-asan ti biag ken imahen ni Pinoy a kas the great Malayan race. #