Footer

OPINION: Saan a politika ti lubong ni Manny Pacquiao (Umuna iti dua a paset)

Napangilangilkami iti iseserrek (manen) ni Manny “Pacman” Pacquiao iti politika. Iti panagkamengna iti Kampi a partido ni Pres. Arroyo, lalo nga immuneg ni Pacquiao iti gayonggayong ti dina ammo a lubong. Maysa a lubong a saan a maiparbeng iti kas kenkuana  nga idolo dagiti agtutubo. Lubong a nasken koma  nga adaywanna. Lubong a ditoy ngatan ti pagultimuan ti kiray ti bituenna no dina ammo ti agimutektek.

Iti damo nga  itatapogna iti politika, saanna a naangot ti nalimed nga intension dagiti nangsugsog kenkuana. Saanmi a tagibassiten ni Pacquiao ngem mamatikami a dagiti la ketdi anniniwan iti asidegna ti mangpataray iti puesto nga iggamanna no inkaso nga adda gasatna. Wen, adda dagiti nangrienda iti lokal a gobierno a saan  a nakadap-aw iti eskuelaan ngem  nasubok ti kabaelan dagitoy a mangipangulo. Naitandudo ken nasibbolda ti respeto ken panagtalek dagiti kailianda a kas maysa a mabigbig ken pagwadan a lider.

Ngem ni Manny? Saan pay a nasubok ti kabaelanna a mangidaulo isu a dimi kanunongan ti itatapogna iti politika. Naim-imbag pay nga adayo no iburayna dagiti miliones, panawen ken impluensiana iti sports nga isu ti pudpudno a lubongna ken kas ‘ari’ iti boksing. Apay a saan a daytoy ti tapoganna a saan ket a ti politika?

Nagadu dagiti agtutubo a kayatna ti agsanay nga agboksing ngem agkurangda iti pagsanayan, agkurangda iti mangisuro kadakuada iti umno nga aramidenda. Nagadu a retiradon a boksingero a nangited iti pammadayaw iti pagilian ngem awan man laeng ti konsueloda iti panagpampannimidda iti malem. 

Agsapsapul ti pagilian  iti kas iti caliber ni Manny. Napaneknekanen nga iti boksing a naaddaan iti medalia ti Filipinas iti Olimpiada. Isu a nasaysayaat a daytoy ti tutokanna a saan ket a ti pulitika. Sursuruenna koma a timbangen dagiti addang ken pangeddengna ta dinto ket maikursong.

Panangtulong kadi kadagiti kailianna ti panggepna? Ala, wen, napintas a panggep. Ngem ad-adda a makatulong iti panagkunami no awan iti politika. Makatulong latta uray awan iti politika.