Komentario: Ti 'Marca Demonyo' ken ti dua a National Artist | Tawid News Magazine - Weekly Ilocos News 📰

Ti ‘Marca Demonyo’ ken ti dua a National Artist

“We Filipinos are mild drinkers, ” kinuna ni Alejandro R. Roces iti maysa a nalatak unay a saritana. Kaanok a nabasa daytoyen? Nabayagen. No diak agriro, elementariak pay la idi. Teksbok ti pakabasaan iti daytoy komedi a sarita. Maysa a sarita kalpasan ti Maikadua a Gubat Sangalubongan a nangiladawan kadatayo a “saan a sarangusong” a mangnginum. A nupay adda met dagiti sarangusong, manmano laeng.

Dagiti saan a “mild drinkers” ti immunan a timmangad iti barsanga. Isuda dagiti ubbing la unay a kimmarit iti kabaelan ni Bacchus, ti diosen ti arak.

Ngem pudno kadi a “mild drinkers’ dagiti Pinoy kas inladawan ni Roces iti saritana? Pudno ngata daytoy? Ta ti maysa a sarita ket ladawan ti gimong iti panawen ti mannurat. Disipulo laeng ni mannurat wenno natudingan a mangsurat ti mapaspasamak iti gimong iti panawenna.

No ibasar iti labelo ti kalatakan ken maysa kadagiti kadaanan nga arak, ti gin wenno Ginebra San Miguel, makuna a mild drinkers ni Pinoy. Ngamin, inabak ni Miguel Arcanghel ti demonio. Napaiddan ti demonio ken sarsarapaennan ti tagbat. Dayta ti dinto maumag a ladawan iti arak. Dayta ti labelo ti arak.

Nabayagen daytoy nga arak a partuat ti Distilleria de Ayala. Agdagupen iti 175 a tawen iti baso ni Pinoy. Idi pay la 1834 ti kaunaan a partuat. Kaaduan a maaramid ken malako daytoy iti sangalubongan.

Ni San Miguel Arcanghel ken ti napaidda a demonio ket interpretasion ti maysa nga artist wenno maibilang a saan a sarangusong dagiti Pinoy ti konseptona. Ket asino met daytoy nga artist? Awan sabali no di ni Fernando Amorsolo. Maysa a drawing ti inaramidna para iti labelo ti arak a nangibatad iti daytoy a konsepto.

Nagustuan ni Enrique Zobel de Ayala daytoy a drawing ni Amorsolo ket pinagadalna iti arte sadiay Madrid, Spain ken pinatulodanna iti allowance a P100. Nagbasa ni Amorsolo sadiay Real Academia de Bellas Artes de San Fernando, ti pagadalan a nagadalan iti arte da Juan Luna, Felix Resurreccion Hidalgo, Jose Rizal ken dadduma pay.

Dagiti konsepto dagiti artist, ket bunga metten ti arte ni Pinoy. Nupay adda latta arak iti biag ni Pinoy, makuna a saan nga isu tay sarangusong nga uminom.

Da Roces ken Amorsolo ket agpada a national artist. Literatura ken ni Alejandro idinto ta panagpinta ken ni Fernando.

Kinapudnona, awan ti mangabak ken ni Bacchus no di met la sika a mismo ket maaramidmo daytoy babaen ti panangisardengmo a mangarit kenkuana. No agtultuloy ti inka pannakidangadang kenkuana, in-inut met a lumawlawa ti tanem a mismo a kalkaliem, agingga a makusbokan ket sika met laeng ti naisangrat iti kinalim. Saan a matay daytoy a didiosen babaen ti agtultuloy a pannakidangadangmo kenkuana. Ngem pulos a di makaporma babaen ti saanmo a panangikaso iti awisna a dangadang. Daytoy laeng ti wagas a pangabakan ken ni Bacchus.

Nagadun ken agtultuloy pay la agingga ita dagiti sinurat maipapan iti arak. Ngamin, tunggal adda umibbet wenno kumayakay ken ni Bacchus, adda met mangpidut ken mangsublat iti dangadang ken mangpadas a mangitayok iti kinaasinona nga agbalin a mitsa ken irarasuk ti dangadang. Agingga a saan a maipasuli ti baso, adda latta ti arak iti biag ni Pinoy. Agtultuloy latta met a maikarga ti sammigel iti baso ni Pinoy.

Ngem masaludsod manen: saan a sarangusong iti arak ni Pinoy?#