Footer

Opisial a polis, naireklamo

NARVACAN, Ilocos Sur.  Maysa a police colonel ti naireklamo iti kuerpo ti polis ditoy gapu iti mapapati nga ipapanna panangbirok iti kinasubang ti kabagianna iti mismo a pagtaengan  daytoy a nakaigapuan ti panagbuteng dagiti bumalay.

Inreklamo ni Wilma Cabbab, 41, residente iti Barangay San Pablo ditoy ni  Police Supt. Alejandro Cabebe gapu iti mapapati a panangkugtarna iti ridaw ti pagtaenganda a birbirokenna ti asawana a ni Arnold.

Kas maibasar iti blotter ti polis, sakbay ti insidente, adda saan a nagkinnaawatan ti asawa ni Wilma ken ni  Rodenson Cabebe, asideg a kabagian ti opisial, a nagresulta iti panagboksingda.

 Mapapati a nagpulong ni Rodenson ken ni Col. Cabebe ket binirok daytoy ti nakaringgor ti kabagianna.

Mapapati a nagturong ni Cabebe iti pagtaengan dagiti ag-Cabbab ket sinapulna ti lalaki.

Kinugtaran ni Cabebe ti main door ti pagtaengan dagiti agassawa idi dina maparuar ni Cabbab.

Agtultuloy ti inbestigasion ti pulisia. (Danny Antalan)