Opisial a rugi ti kampania dagiti para senador ken partylist

MANGRUGI inton bigat, Pebrero 12, 2019 ti opisial a kampania dagiti kandidato a para senador ken partylist kas intuyang ti Commission on Elections.

Inyetnag metten ti Comelec ti final a listaan dagiti kandidato para iti May 13, 2019 National/Local Elections. Impakaammo ni Comelec Spokesperson James Jimenez nga agdagup iti 64 dagiti nabati nga opisial a kandidato a para senador, ken 134 met dagiti accredited a partylist.

Naarisiten dagiti kandidato a nuisance wenno lilibeg wenno dagiti awanan iti kabaelan a mangisayangkat iti nainsaknapan a panagkampania iti pagilian.

Nakessayanen ti bilang dagiti kandidato para kadagiti national positions tapno saan unay nga atiddog ti balota ken adu unay ti pagpilian dagiti botante. Ngem ania ti pudno a kangrunaan a nagbasaran ti Comelec iti pannakasagat dagiti kandidato a para senador? Umanay kadin ti kinaawan iti adu a kuarta wenno kabaelan a mangisayangkat iti nailian a kampania? Maikanatad kadi ti linaon ti Fair Election Act no dagiti laengen addaan iti napigsa a partido ken adu ti pondona ti mapalubosan nga agkandidato para iti national position?

Manipud iti orihinal a listaan dagiti nagipila iti kandidatura a para senador, adu dagiti nasagat nga addaan iti kabaelan nga agserbi ken addaan iti napudno a tarigagay ken panggep nga agbalin a senador, ngem naarisitda gapu ti kinaawan ti partido ken adu a pondoda. Adu met dagiti nalatak ken sigud payen a senador nga agngayangay manen, ngem mapagduduaan ti kabaelan wenno integridadda, ngem napalubosanda gapu ta adda partido ken adu ti pondoda.

Adda dagiti agngayangay nga agsubli a senador a nabalud ken nainanaigen iti kurapsion ken Plunder, ken naka-pending dagiti kasoda iti Sandiganbayan ken Ombudsman. Ngem saanda a naikkat iti listaan iti opisial a kandidato ta awan ti linteg a makatubeng iti panagkandidatoda no awan pay ti final judgement nga inyetnag ti Korte Suprema.

Nasayaat koma no maamendaran ti linteg ket mapawilanen nga agkandidato iti uray ania a posision iti gobierno dagiti amin a nasentensiaan ken addaan iti pending a kaso a Graft and Corruption wenno Plunder iti Korte Suprema tapno dagusen a masagat dagiti mannibrong a kandidato ket saandan a makasubli iti gobierno ta no mangabakda ket agpeggadto manen a maibulsa dagiti pondo a nagtaud iti buis dagiti tattao.     

Saan a talaga a patas dagiti linteg iti eleksion ta uray no maibagbaga a maikkan iti agpapada a gundaway dagiti amin a kandidato ngem maatiw latta dagiti awanan iti napigsa a partido ken adu a pondo.

Makatawen pay idi sakbay ti opisial a rugi ti kampania ngem nabayagen dagiti babaknang a politiko nga agpapaanunsio iti mass media ken social media nangruna iti telebision ken radio. Nabayagen dagiti awareness and advocacy campaign dagiti kandidato ngem mapalpalubosanda. Agkaiwara metten dagiti naipaskil ken naimontar a tarpaulin dagiti kandidato. Adu metten dagiti kandidato dagiti nabayagen nga agpaspasiar kadagiti nagduduma a paset ti pagilian ti mapan dumaw-dawat iti suporta dagiti opisial dagiti lokal a gobierno ken pribado a sektor.

Mapalubosan latta dagitoy a panagpasiar, ken panagpaanunsio dagiti politiko agingga nga awan dagiti direkta a mensahe nga ibotos ida gapu ta nabayagen nga indeklarar ti Korte Suprema nga awan ti pre-mature campaigning. Ngem nalawag a dagitoy nga aramid dagiti politiko a panangballikog ti linteg, ngem daksanggasat ta kinanunongan met ti Korte Suprema.

Naindaklan ti impluensia ti media ken dagiti political advertisements kadagiti botante iti panangpilida kadagiti kandidato a para senador. Uray no makabael ken nangato ti integridad ti kandidato, maabak latta no saan nga am-ammo dagiti tattao. Mangabak met ti kandidato uray awan ti ammona wenno kurap no adu ti pondona ken nairaman iti napigsa a partido.

Naarisit metten ti bilang dagiti orihinal a partylist iti 134, ngem adu pay laeng daytoy a mabalin a mangulaw kadagiti botante nangruna kadagiti nataengan. Babaen ti partylist representative, naikkan ti gundaway dagiti maipapaigid a sektor ti oportunidad a makaibaon kadagiti pannakabagida iti House of Representatives tapno adda mangirupir ti pagimbagan ken karbenganda. Dagiti partylist representatives a mangibagi iti maysa a sektor ket addaan met laeng iti kapada a sueldo ken benepisio dagiti kongresista dagiti distrito.

Maibasar iti report, apagkatlo iti kadagupan a bilang dagiti accredited partylist ket binukel met laeng dagiti pamilia dagiti politiko iti nagduduma a paset ti Pilipinas. Nagbalinen ti sistema ti partylist kas backdoor entrance dagiti kameng dagiti pamilia dagiti politiko a sumrek iti Kongreso no awan ti pagpuestuanda kadagiti distritoda. Naipadamag a ti asawa ken anak ti maysa a kongresista iti distrito ket agtaray wenno nominee ti nagduma a partylist. No mangabakda dagiti agassawa ken ti anakda ket tallodanton a kongresista. Naipaigid ngaruden ti pudno a panggep ti partylist representative.    

Iti panaglabas dagiti aldaw agingga iti kaaldawan ti eleksion, amirisen ken sagaten koma dagiti botante dagiti kandidato a para senador, dagiti nominee dagiti partylist ken dagiti agtaray iti distrito ken lokal a gobierno tapno maisaad dagiti kasayaatan a makaited iti napudno a serbisio kadagiti Pilipino. (Eden Alviar)