Opisialen: Vice Mayor Ryan Singson ti kandidato ti Bileg Party para diputado iti umuna a distrito

VIGAN CITY – Opisialen a ni Vigan City Vice Mayor Ryan Luis Singson ti kandidato ti Partido Bileg iti special election para iti nabakante a puesto ti kinadiputado iti umuna a distrito ti Ilocos Sur a maangay inton Mayo 28.

Segun ken ni Gov. Luis “Chavit” Singson, ti anakna a ni Ryan ti napili dagiti dadaulo ti partido iti probinsia a kumandidato para iti puesto a binakantean ni dati a Congressman ti First District Ronald Singson a mangikarkaro iti sentensiana a makatawen ken innem a bulan iti pagbaludan iti Hong Kong gapu iti panagikutna iti maiparparit a droga.

Impalgak ti gobernador a pito a nagan ti nagpilian dagiti lider ti partido iti probinsia a pakaibilanganna, ni Vice Gov. Deogracias Victor Savellano, Bokal Jerry Singson, dati a Congressman Salacnib Baterina, dati a Congressman Mariano Tajon, Mayor ti Sto. Domingo Lito Tadena ken Vice Mayor Ryan Singson ket ti anakna ti napagnunummuan ti grupo nga ibayogda a kandidato para iti special election inton Mayo 28.

Kinuna ni Singson a napagtutulagan dagiti dadaulo ti partido a suportaran ti kandidatura ti anakna iti masungad nga eleksion.

Nupay kasta, kinuna ti gobernador a no adda sabali nga agkandidato nga aggapu iti grupo, saan a maparitan daytoy agsipud ta impaganetgetna nga “addatayo iti  nademokrasiaan a pagilian”.

“Ti la dawatek, agbalin koma ti eleksion a natalna, awan koma ti pammutbuteng, awan ti inuulbod tapno saan a maallilaw dagiti kaprobinsiaantayo,” kinuna ti gobernador.

Kabayatanna, nagyaman ni Singson gapu iti pannakapilina a kandidato para iti binakantean ti kabsatna a puesto.

“Dakkel a challenge kaniak daytoy tapno ad-adda pay nga agtrabahoak para kadagiti kailiak iti umuna a distrito,” kinuna ti bise mayor.

Kinuna ni Singson a no isu ti mangabak, itultuloyna nga iringpas dagiti proyekto a napanawan ti kabsatna sananto irugi dagiti bukodna a proyekto.

Indeklara ti Kamara a bakante ti puesto ti kinadiputado iti umuna a distrito ti Ilocos Sur kalpasan ti pannakayetnag ti sentensia ti Hong Kong court ken ni dati a Cong. Ronald Singson gapu iti drug trafficking.

Bayat ti kaawan ti mangibagi iti first district ti probinsia, ni pay laeng House Speaker Feliciano Belmonte ti agpapaay a caretaker.

Itay nabiit, intuding ti Commission on Elections Manila ti pannakaangay ti special election inton Mayo 28 kalpasan ti pannakaideklara iti Kamara ti panagbakante ti puesto ti umuna a distrito ti Ilocos Sur.

Iti panagkandidato ni Vice Mayor Singson a para diputado ti umuna a distrito, ni Konsehal Lourdes Baquiran ti maital-o a bise mayor ti Vigan City agsipud ta isu ti kangatuan ti nagun-od a butos iti eleksion idi 2010.#