Oplan Katok: 3 paltog, naisuko iti polis

CERVANTES, Ilocos Sur –  Tallo a paltog ti nagsasaruno a naisuko iti police station kas resulta ti Oplan Tokhang nga ipakpakat ti kapolisan ditoy nga ili.

Maysa a caliber 45 pistol Colt MK IV Series 80, nga addaan serial number 518843 ti boluntario nga insuko da Barangay Kagawad Santiago Calam-ang ken Agosto Felipe ken ni Chief of Police Chief Inspector Napoleon Gao-ay bayat ti panagiwayatda iti Operation Tokhang sadiay Barangay Comilias North idi bigat ti Agosto 23.

Segun kada Calam-ang ken Felipe, bayat ti panagdaliasat ti motorsikloda iti Barangay Colalo nga agturong iti Mankayan, Benguet, nakitada ti maysa a nangisit a bag iti abaga ti kalsada.

Sinardengan dagiti dua ti bag ket idi linuktanda, naduktalanda a paltog ti kinargana.

Maysa a shotgun gauge 12 (homemade) ti insuko ni Louie Reynante y Reconsal, 33, naasawaan, ken residente iti Barangay Rosario,iti polis idi agsapa ti Agosto 24.

Kinuna ni Reynante a nakitana ti maysa a sako iti igid ti dalan bayat ti panagturongna iti kapagayanna a masarakan iti Sitio Tamaang, Barangay Rosario, Cervantes.

Idi sinukimat ni Reynante ti sako, naduktalanna ti nasao a paltog iti uneg.

Kabayatanna, maysa nga Armscor pistol nga addaan serial number 769885 ti boluntario nga insuko ni Simeon Iniaca y Lapius, 42, naasawaan, mannalon, ken residente iti Barangay Aluling, Cervantes idi malem ti Agosto 24.

Kinuna ni Gao-ay a naisuko dagiti paltog kas resulta ti isaysayangkatda nga Oplan Tokhang ken Oplan Katok.#