Oplan Paglalansag Omega, nagsasaruno nga inwayat ti CIDG

SINAIT, Ilocos Sur – Positibo amin ti resulta ti uppat a search warrants a nagsasaganad nga insayangkat ti kapolisan kas paset ti Oplan Paglalasag Omega iti dua a barangay ditoy nga ili idi Marso 30.

Iti report ti Ilocos Sur Criminal Investigation and Detection Group a napetsaan Marso 30, sinukisok dagiti joint elements ti Ilocos Sur CIDT, ISPPSC, PIB ken Sinait police station ti balay da Andres Agdeppa y Arrieta ken Ruben Perez y Ipac sadiay Barangay Marnay; iti kubo ni Perez sadiay Cabulalaan, Sinait ken sabali a balay ni Agdeppa a nakakumpiskaanda kadagiti paltog ken balbala.

Sadiay Barangay Marnay, nakakumpiska dagiti elemento ti kapolisan iti balay ni Andres Agdeppa iti maysa a homemade caliber 38 revolver a nagkarga iti tallo a rikos ti bala ken iti balay ni Ruben Perez y Ipac iti maysa a Caliber 45 pistol a nagkarga iti 6 rounds ti bala, maysa a homemade 12 gauge shotgun ken dua a bala para iti nasao a paltog.

Iti Barangay Cabulalaan, nakakumpiska dagiti nagsukisok a polis iti dua a magasin para iti caliber 7.52 M14 rifle ken 20 rounds of live ammunition para iti caliber 7.62 iti kubo ni Ruben Perez; idinto a maysa a homemade caliber 22 rifle a nagkarga iti uppat a rounds ti bala iti balay ni Roger Agdeppa y Inda.

Naipan iti CIDG office dagiti suspek ken dagiti nakumpiska iti balayda para iti umisu a disposision. Maisagsagana metten ti kaso maikontra kadakuada.#