Opo Pinoy Style, Ania Daytoy?

Salaysay ni Jobert M. Pacnis

Maudi iti dua a paset

 

 

Ditoy Opo Pinoy, naipakita dagiti pagaayattayo a saramsam a kas iti balut, ti salatayo a tinikling, ti mapukpukawen a kalesa a klase ti transportasion, dagiti landmark-tayo, ken ti mapukpukawen a Po-Opo wenno daytoy panagmano kadagiti nataengan. Nakapinpinoy ti setting-na!

Adda met pangkellaat a paset ti bideo. Isu daytoy ti panagparang ni Paula Salvosa. Ta asino ngamin ni Paula? Kas ken ni Mikey, naglatak met iti YouTube. Malagip a nayaplod iti internet ti bideona a bugbugkawanna ti maysa a babai a guardia ti LRT Manila. Iningli-Inglesna. Ti dakesna, naalaan iti bideo. Nga isu daytoy ti nayaplod iti Youtube.

Gapu itoy, naglatak la ket ngarud ti saona nga Amalayer (I’m a lier, manipud iti liar). Ti dakes, nagsagrap iti makunkuna a cyber bullying. Nakaawat kadagiti adu a pammabalaw, panangipangta. Ken napagsasawan.

Sineknan iti nakana a depression. Saanen a kas idi naragsak a rumrummuar. Liniklikanna pay ketdin ta masaktan laeng. Adda latta ngamin dagitay mangpasagid kenkuana no malasinda.

Depensana, dina basol ti napasamak. Ti laeng naala a bideo ket ti panawen a napunnuanen gapu iti kinabalasubas ti empleado.

Pagyamyamananna ta adda maysa a grupo (church community) a nakipatang kenkuana ket naawatanda ti biangna. Tinulonganda daytoy tapno malabananna ti depression a bunga ti pannaka-cyber bully-na.

Ita, nagsublin ti kinaragsakna. Ti dati a kinataona. Nupay kasta, addada latta maaw-awatna a pannakatagibassit. Ngem dinan ikankano daytoy.

Ket limmatak!

Ti Opo Pinoy Style, kaniak a biang, maysa nga instrumento tapno mapasubli dagiti maliplipatanen a kulturatayo. Nabileg la ketdi daytoy a mangisubli iti ayattayo a mangparang-ay, saan a manglipat, iti nabaknang a kulturatayo. Ta asino pay koma ti mangipateg iti bukodtayo no di datayo met laeng.

Ngem kas iti kaadduan, adda latta panagmawmaw ti kinalatak ti maysa a banag. Ngem sapay la koma ta ti adal nga impaay dayta a banag, saan a lipaten. Ikkan-biag ketdi iti inaldaw-aldaw.

Ala, ag-Opo Pinoy Style-tayo ngaruden!#