Opo Pinoy Style, Ania Daytoy?

Salaysay ni Jobert M. Pacnis

Umuna iti dua a paset

 

Oppa Gangnam Style! Asino ti di makaammo kadayta a kanta? Iti sangalubongan, nakalatlataken daytoy a kanta ni Psy, maysa a Koreano. Riniwriw ti follower-na iti YouTube. Wen, a, ta pudno man met a makaray-aw ti tonona. Inayon pay dayta langa ni Psy nga uray garawna laeng, maliwliwakan. Saan la a dayta. Adda pay kayawna a manggutigot iti tunggal maysa tapno agwatwat. Ta pudno man met a makaregreg-taba dagiti steps ti nasao a kanta.

Manon a bulan nga umaw-aweng ti Oppa Gangnam. Kadagiti bodaan iti probinsia, di a maaw-awan daytoy a rekues tapno salaen. Iti met programa kadagiti pagadalan, adda latta a maipatayab wenno mai-perform a pakaray-awan dagiti agbuybuya.

Dagiti pangulo wenno ambassador dagiti nadumaduma a pagilian, mabuya metten a makigang-Gangnam. Saan ngaruden a nakakaskasdaaw a kasta la unay ti kasikat ni Psy iti sangalubongan.

Malagip met nga inusar ti Departamento ti Salun-at ditoy pagiliantayo ti nasao a kanta a kas kampaniana kontra iti panagpaputok iti panangpasungad iti Baro a Tawen. Kayat ti ahensia a maikabassit (no di man awan a naminpinsan) ti mabalin a biktima ti paputok. Ket segun iti resulta, nagballigi ti nasao a programa. Ditoy, nalawag nga inusar ti departamento ti kinalatak ti kanta tapno agbalin nga epektibo ti programa.

Wen, adayon ti nagteng ti kanta. Ngem mano kadatayo ti makaammo iti sasawen ti kanta? Asino ti makaawat iti lirikona? Ti ammotayo laeng, maysa a lugar ti Gangnam idiay Korea.

Ngem addaytan ti kanta. Ti kinalatakna. Inarakuptayon a namimpinsan. Maysa manen a linabag ti biagtayo ti inokuparna.

Saan met ketdi a nakakaskasdaaw daytoy ta iti kaadu ti parikuttayo iti inaldaw-aldaw, agsapsapultay’ laeng iti makaikkat kadagitoy a dagensen uray apagapaman laeng. Ket daytoy Oppa Gangnam Style ti nakasarakantayo kadayta.

Ita, adtoy met nga aglatlatak ti Opo Pinoy Style ni Mikey Bustos, maysa a Pinoy internet sensation (iti tv ads a chicharon ni Mang Juan a nagmaglatak ken Bustos, maigapu iti Pilipino accent English —Ed). Ania manen daytoy? Iti titulo pay laeng, ammotayon a Pinoy bersion ti Oppa Gangnam Style. Kaano laeng a nayup-load iti YouTube ngem kaguduan a million ti follower-na. Ti nakaay-ayat iti nasao a video, trinatarna ti kultura ni Kayumanggi; ken siempre, Filipino ti nausar a lengguahe. Maawatantayo ngarud.

Naruay dagiti immuna a Pinoy bersion, spoof ken parody itoy a kanta, a kas iti Mukhang Bangkay, Oro compound style, oppa gaya style, Michael V style, kopya gaya style, pinoy gangnam style, maskulado style, visaya style; uray ti angry birds ken Alvin and the chipmunks ken dadduma pay.#