Footer

Ordinansa a mangbaliw nagan ti pagadalan, di inayonan ti NHI

CANDON CITY – Saan nga inaprobaran ti National Historical Institute (NHI) ti maysa nga ordinansa nga impasa ti Sangguniang Panlungsod ditoy a mangsukat iti nagan ti maysa a pagadalan elementaria ditoy siudad.

Kas maibasar iti City Ordinance No. 022-200 ken Resolution No. 08-002, kiniddaw ti konseho ditoy iti NHI ti pannakabaliw ti nagan ti Cubcubbuot Elementary School tapno agbalin a CUBPALSAN Elementary School.

Kas maibasar  iti resolusion, saan laeng a taga-Cubcubbuot dagiti ubbing nga agbasbasa iti nasao a pagadalan no di pay manipud iti Palacapac ken San Andres ket ditoy a naadaw ti singasing a nagan ti pagadalan manipud iti Cubcubbuot Elementary School  iti Cubpalsan Elementary School (Cubcubbuot, Palacapac, San Andres).

Ngem iti sungbatna a surat nga impatulodna iti siudad ditoy, kinuna ti NHI a saanna nga inaprobaran ti resulusion nga impasa ti sangguniang panlungsod agsipud ta saan nga umanay ti panagtitipon ti nagan dagiti tallo a barangay a mangsupsuporta iti nasao a pagadalan tapno masuktan ti dati a naganna.

Segun iti NHI, masapul a ti proposed a baro a nagan ket “addaan iti historical ken cultural significance, ken aesthetic elements” tapno adda pagbatayan iti pannakaanamongna.

Kinuna pay ti NHI  a ti nagan dagiti local heroes ken prominent cultural properties dagiti sabali pay a konsiderasion para iti pannakasukat ti nagan ti maysa a pagadalan.

Para iti naan-anay a pannakalawlawag ti konseho, nangipatulod pay ti NHI iti guidelines iti pannakanagan wenno pannakabaliw ti nagan dagiti public schools tapno adda pagibasaranna iti masakbayan.#