Ordinansa a naisingit iti 2nd reading nupay di naikalendario, linabsingna ti IRP: chairman ti committee on rules

VIGAN CITY – Kinuna ti chairman ti committee on rules ti sangguniang panlungsod ditoy siudad a nalabsing ti internal rules of procedure iti pannakaisingit ti maysa nga ordinansa iti second reading nupay saan a naikalendario.

Iti pannakiuman kenkuana ni Jun Ramos, anchorman ti Barangay Commando Brigada a naipatangatang iti DWRS idi Agosto 6, kinuna ni Konsehal Ramil Arce, chairman ti committee on rules, kinontrana ti kapanunotan ti dua a konsehal nga awan ti nalabsing iti pannakaisingit ti ordinansa ni Konsehal Kristen Figuerres para iti second reading.

Kinuna ni Arce a nalabsing  ti three-reading principle iti pannakaisingit ti ordinansa ni Konsehal Kristen Benedict Figuerres para iti second reading nupay naikalendario laeng para iti first reading.

Kinuna ni Arce nga aglasat ti proposed ordinance iti first, second ken final reading.

Iti session ti sangguniang panlungsod idi Hulio 29, in-move ni Figuerres a mairaman iti maikadua a pannakaibasa ti ordinansana a mangamendar iti Health and Sanitation Code a naikalendario para iti first reading iti dayta a session.

Kangrunaan a rason ni Figuerres ti pannakaisayangkaten ti public hearing pakaseknan ti pannakaamendar ti Health and Sanitation Code ket no masurot ti IRP, agsipud ta naikalendario laeng iti ordinansa iti first reading, maidatag daytoy iti committee on health.

“No kastoy ti mapasamak,  maisayangkat ti sabali manen a public hearing ket mapaayaban dagiti stakeholders nga involved a pakaibilangan ti city health officer, tesorera, medical technologist ken dadduma pay nga involved a pakataktakdanda ken pakaapektaran ti serbisio dagitoy nga opisina ken sabali pay a pagbusbosan ti sang-guniang panlungsod iti para merienda,” panangikalintegan ni Figuerres iti singasingna.

Ngem kinuna ni Arce a sabali ti ordinansa a mangamendar iti sumagmamano a probiso iti Revenue Code idinto a separate nga ordinansa ti mangamendar iti Health and Sanitation Code.

“Ket iti pammatitayo, gapu ta separate and distinct ordinance diay maikadua a naiproposed…, rumbeng laeng nga aglasat iti 3-reading principle,” kinuna ni Arce.

Kinuna met ni Villanueva a naikalendario ti ordinansa a maibasa iti first reading ken saan a nairaman para iti second reading agsipud ta awan pay ti numerona.

Masapul a masurot ti internal rules of procedure, kinuna ni Villanueva.

Ngem iti baet ti objection ti chairman ti committee on rules, pinaboran dagiti konsehal iti panagbubutosda ti pannakaisingit ti ordinansa ni Figuerres para iti second reading, banag a di nagustuan ni Konsehal George Villanueva ket impakdaarna ti panaglusulosna a miembro iti committee on rules.

“Ania pay ti serbina nga agmiembroak no saan met la a masursurot ti naited a poder ti committee on rules nga agaramid iti calendar of business?” kinuna ni Villanueva.

Segun ken ni Villanueva a kas sagudayen ti internal rules of procedure, saan koma a naipalubos ti pannakaisingit ti ordinansa ni Figuerres para iti second reading agsipud ta naikalendario laeng para iti first reading ken awan pay ti numerona ngem inaponaran met ti majority ti konseho ket kas panangtakderna iti prinsipiona isu a naglusulos a miembro ti committee on rules.#