VIGAN CITY – Adda dagiti naipasa nga ordinansa iti Sangguniang Panlungsod ditoy a matmaturog gapu ta saanda a mayim-implementar.
Linagidaw ni Konsehal Hermenigildo Apelin bayat ti session ti konseho itay Sept. 18 ti saan a pannakayim-implementar ti ordinansa a pinutarna a saan a pannakaipalubos dagiti nadagsen ken natayag a behikulo a lumasat iti Vigan Heritage Village ditoy.
Naibaskag pay ti pammaliiw nga adda latta dagiti maibodbodega a tagilako nga addaan iti kemikal kas iti pinta ken dadduma pay nga inflammable materials iti Heritage Village idinto nga adda ordinansa a mangiparit iti daytoy.
Kanaig daytoy, kinuna ni Konsehal Everin Molina, chair ti committee on rules, a mapaayaban dagiti implementors dagiti nasao nga ordinansa tapno ipalawagda no apay a saan a mayim-implementar dagitoy.
Kinuna ni Molina a mangtawag ti oversight committee iti taripnong kadagiti maseknan tapno mailawlawag dagitoy a pammaliiw kadagiti saan a maipatpatungpal nga ordinansa ken maala ti sungbat dagiti implementing agents tapno maireport iti mayor dagiti rummuar a problema ket maikkan iti solusion dagitoy.
“It’s high time a bisitaentayo dagitoy nga ordinansa no maipatpatungpal met laeng,” kinuna ni Molina.
Imbaskag ni Apelin daytoy a kapaliiwanna bayat ti pannakatratar ti ordinansa a pinutar ni Konsehal Alfredo Figuerres a pannakaiwayat ti fire drill iti siudad tapno nasaysayud ti operasion a panangkontrol iti uram, nangruna no mapasamak iti Heritage Village a pakasarakan kadagiti duog a pagtaengan a naipatakder pay idi panawen dagiti Kastila ken kangrunaan a tourist attraction ti siudad.
Kinuna ni Molina a masapul a maprebentaran (daan a pasdek iti uneg ti Vigan), “saantayon nga urayen a mapasamak pay ti kayat ti ordinansa a prebentaren.”
“Nasayaat koma no adda regular a miting ti ehekutibo ken lehislatibo tapno ma-treshout dagitoy a problema,” kinuna ni Molina.
