Ordinansa a mang-regulate iti panagusar iti paputok, nairiing

VIGAN CITY, Ilocos Sur – Inriing ti maysa a bokal ti pannakaaprobaren ti naisingasing nga ordinansa a mang-regulate iti panagusar iti paputok iti isasangbay ti baro a tawen.

Indagadag ni Bokal Robert Tudayan a maaprobaranen ti pinutarna nga ordinansa sakbay ti panaggibus daytoy a tawen tapno masaluadan dagiti umili iti desgrasia mainaig iti panagusar iti paputok tunggal baro a tawen.

Kinuna ni Tudayan nga idi pay la Enero 2014 ti panangipilana ti nasao nga ordinansa gapu iti napasamak a pannakatay ti maysa nga ubing a biktima iti naiwawa a bala sadiay Caoayan, Ilocos Sur bayat ti selebrasion ti baro a tawen.

Kas sagudayen ti nasao nga ordinansa, maituding ti maysa a lugar a pagpabettakan iti paputok tapno mamonitor dagitoy bayat ti selebrasion iti baro a tawen.#