Footer

Ordinansa, resolusion, inaprobaran ti hunta probinsial

VIGAN CITY – Inaprobaran ti sangguniang panlalawigan iti panagsessionda idi Agosto 3 ti resolusion ni Vice Governor Deogracias Victor Savellano a mangdutok iti maysa a Geriatric doctor a mangkita iti amin a kasapulan medikal dagiti lallakay ken babbaket iti Balay Taripato iti Magsingal ken Balay Taripato Annex iti Cabugao.

Kinuna ti bise gobernador a nupay kompleto iti caregivers dagiti dua a home for the aged, adda latta dagiti gundaway a kasapulan ti  serbisio ti maysa a doktor a mangtaming kadagiti residente.

Karaman pay kadagiti naaprobaran itoy a session ti  resolusion a mangkidkiddaw iti pannakaipasdek ti provincial veterinary clinic iti BArang-ay Demofarm ken sabali pay a resolusion a mangkidkiddaw iti pannakaipasdek ti vermiculture center babaen ti panangirekomenda ni SPM Ishmael Baterina, Supplemental Budget 1 and 2 ti Suyo nga aggatad iti P153,145.32 ken P1,801,802.86, Municipal Ordinance 08-2010 ti Lidlidda a mangiyalokar iti P20,255,000; Municipal Ordinance 01-2010 ti San Juan a mangiyalokar iti P25,198,249; ken Municipal Ordinance 04 ti Sta. Lucia a mangiyalokar iti P1,000,000 manipud iti R.A. 7171 municipal share dagiti nadakamat nga ili babaen ti panangirekomenda ni SPM Robert Tudayan.

Karaman a naaprobaran ti Ordinance 187-2010 ti Cervantes a mangiyimplementar iti panamagsisina iti basura manipud iti tunggal balay (source) ken mangamiendar iti Municipal Ordinance No. 078-2001 a mangideklara iti pagannurotan ken iskediul ti pannakakolekta dagiti basura iti poblacion area ti ili; ordinance 37-2010 ti Quirino a mangipasdek iti municipal special scholarship program ti Quirino para kadagiti kualipikado a kandidata iti Search for Miss Quirino manipud iti 2009 ken iti sumarsarunon a tawtawen babaen ti panangirekomenda ni SPM Orlino Tesoro.#