Organic farming ken technical skills, mayad-adal iti Ilocos Sur Provincial Jail

BANTAY, Ilocos Sur — Agtultuloy ti pannakaisayangkat dagiti panagsanay iti organic farming ken technical skills kas iti electrician and welder training para kadagiti persons deprived of liberty (PDL) wenno dagiti inmates iti Ilocos Sur Provincial Jail (ISPJ) tapno maaddaanda iti naan-anay a kabaelan kadagitoy a trabaho tapno adda mausarda iti panagbiagda nangruna inton mawayawayaanda, ken saanda a masimronan iti kasasaadda kabayatan ti kaaddada iti pagbaludan a panangur-urayda ti pagdur-asan dagiti kasoda.

Kaleplepleppas ita a bulan ti panagsanay iti organic farming ken technical courses para kadagiti PDL babaen ti pannakikaysa ti Department of Agriculture – Agriculture Training Institute ken Technical Education, Skills Development Authority a nangipaay kadagiti nalaing ken beterano a trainors ken alikamen tapno epektibo ti panagsanay. Naipaayan pay iti certificate dagiti nakaturpos iti panagsanay, ken nawarasanda kadagiti kasapulanda nga alikamen wenno basic tools.

Maisaysayangkat dagiti training courses iti ISPJ babaen ti panangilungalong ti Provincial Warden Raymund Tabios ken nalaus a suporta ti Provincial Government iti panangidaulo ni Governor Ryan Luis Singson tapno dagiti PDL ket mareporma ken maaddaanda iti training kadagiti kurso a pagessemanda a mausarda iti panagbiagda.

Naikkanen ti ISPJ iti accreditation manipud iti DA – ATI a pagsanayan iti organic farming. Maibilang a modelo ti organic farm iti uneg ti ISPJ a pakaimulmulaan dagiti nagduduma a klase ti nateng a dakkel a katulongan para iti inaldaw a taraon dagiti PDL tapno saanda a makurangan iti sidaen.

Mabigbig met ti pamataudan iti cultured mushroom wenno uong. Dagiti dadduma nga apit a nateng ken uong ket mailako kadagiti tiendaan a pakairanudan dagiti pamilia dagiti PDL.

Nagbalinen ti organic farm iti ISPJ a nalatak nga educational destination dagiti agsansanay iti organiko a panagtalon manipud kadagiti nagduduma a lugar iti Kailokuan, a nakaigapuan a nakapilian a maysa kadagiti kasayaatan a Provincial Jail iti intero a Pilipinas.

Kadagiti naglabas, naaramid pay dagiti dadduma a panagsanay kas ti panagpataud ti bonsai a mula, vocational trainings iti panagaramidan kadagiti nagduduma a dekorasion, ken dagiti parol para iti Paskua. 

Iti daytoy a panawen ti Paskua, naganar dagiti produkto dagiti PDL nangruna dagiti parol ken dekorasion a dagiti naglakuan ket dakkel a tulong kadakuada ken dagiti pamiliada iti ruar.

Naindaklan met a tulong kadagiti PDL ti naespirituan a pannakataraonda babaen ti masansan nga ibibisita dagiti padi, pastor ken dadduma pay a pannakabagi ti nagduduma a sekta ti pammati tapno maikasaba kadakuada ti ayat ken asi ti Dios.

Iti liderato ni Tabios ken suporta ti Provincial Government, napagbalinen ti ISPJ a pagwadan a pagsanayan nangruna ti organiko a panagtalon manipud idi nayakar ti 1.4 nga ektaria a jail compound iti baro a nagsaadanna iti Brgy. Taleb iti daytoy nga ili idi 2014. 

Babaen ti panagtitinnulong dagiti PDL ken panangbayabay ti Provincial Agricultural Office, napagbalinda ti sigud a kabatuan ken naglaeg a daga a nasayaat a talon kalpasan a naikkat dagiti akinrabaw a bato ken nagaburan iti nasurok a 70 truckloads a garden soil. Kalpasanna, nabingbingay kadagiti selda dagiti PDL ti sukayen ken pagmulaanda kadagiti nagduduma a klase ti nateng.

Dagiti amin a mula ket mataraken babaen kadagiti organiko nga abono ken pestisidio ket natalgedda a taraon ta awan ti makasabidong a kemikal a nausar agingga iti maapitda.

Iti panaglabas ti sumagmamano a tawen, ad-adda pay a dimmur-as ti organic farming iti ISPJ agingga a nabigbig nga umuna a Provincial Jail iti Region I kas organic farming training center a mismo a dagiti pay inmates ti agpapaayen a facilitators ken trainors kalpasan ti panangsanay kadakuada dagiti agpapaay iti DA. ●