Malakas Farm sadiay Muraya, San Juan, binigbigen ti DA a pagsanayan ti organic farming

Malakas Farm (photo from Malakas Farm official Facebook Page)

SAN JUAN, Ilocos Sur — Binigbigen ti Agricultural Training Institute ti Department of Agriculture ti Malakas Farm sadiay Sitio Malakas, Brgy. Muraya, San Juan a pagsanayan iti organiko a panagtalon ket umad-adun dagiti mapan bumisita iti daytoy a lugar tapno agadal kadagiti baro a teknolohia ti organic farming kangrunaanna ti panagpataud ti cultured mushroom.

Dayta ti impakaammo ni Mr. Robert Viloria, owner-manager ti Malakas farm kabayatan ti pannakiuman kenkuana dagiti kameng ti Ilocos Sur Integrated Press iti naangay a Kapihan iti Amianan Media Forum.

Impakaammo ni Mr. Viloria nga umad-adun dagiti mannalon a bumisbisita iti farm nga aggapu pay kadagiti sabali nga ili ken probinsia tapno agpaliiw ken agadalda kadagiti kabaruanan a wagas ti panagaramid ti organiko nga abono, ken moderno a proseso ti panagpatubo ti uong tapno makasalimetmet iti mausar a gastos. Impalgakna pay ti pannakaaramid ti baro a laboratorio iti bukel ti uong, aqua-culture pond a pagtaraknan kadagiti lames, ken solar water pump a napunduan babaen ti grants manipud iti United States Peace Corps.

Imparamanna pay dagiti naimas a nagduduma a produkto a makan a ti kangrunaan a ramenna ket uong a nadaras a malako kadagiti dardar-ayanda a trade fair iti nagduduma a lugar. Impannakkelna a produkto dagiti mushroom bagnet, burger, muffin, pandesal, bibingka ken dadduma pay a makan. Impanakkelna a dagiti produktoda ket maibilang a healthy foods ta natalged a maipauneg a taraon ta organiko amin dagiti ramenda. Inlawlawagna nga agtultuloy ti panagsukisok dagiti production staff iti farm tapno makaaramidda pay iti nayon a produkto a mailakoda kadagiti health-conscious a customer.

Inlawlawag pay ni Mr. Viloria a kalaksidan ti itutulong ti Department of Agriculture iti Malakas farm ket sumupsuporta pay iti nagduduma nga aspeto ti Department of Trade and Industry, Department of Science and Technology ken lokal a gobierno para ti panagdur-as ti organic farm. Sinalaysayna ti planoda a mangipatakder kadagiti cottages a mabalin a pagdagusan dagiti mapan agadal iti Malakas farm.

Impakaammona a manipud iti maysa a pamilia a katulonganna iti Malakas farm idi 2017, ket walon a pamilia dagiti tumultulong ken agnanaed iti farm. Impalgakna ti planoda a mangbukel iti kooperatiba tapno ad-adu dagiti magun-odda a tulong para ti panagdur-as ti farm ket ad-adunto dagiti mabenepisiaran.

Sinalaysayna a ti Malakas farm ket pinatakderda nga agassawa kalpasan ti panagretiroda iti panagtrabahoda sadiay California, USA, tapno makatulongda kadagiti kailianda, ken adda naulimek ken nangayed a lugar a pagnaedanda ken ti asawana para iti simple ken nakappia a panagbiag. Impalgakna a ti panangbangon ken panangpadur-asna iti Malakas farm ket wagas ti panangiburayna kadagiti kailianna dagiti nagun-odda nga agassawa nga adu a grasia ken parabur ni Apo Dios.

Ni Mr. Viloria ket nagretiro a Director ti Human Resource Management Division ti Levi’s Strauss sadiay USA sakbay ti panagawidna iti Pilipinas ken panangpatakderna ti Sitio Malakas.