CAOAYAN, Ilocos Sur – Madama ti konstruksion ti maysa a pinakbet farm ditoy nga ili a manamnama a malpas inton Abril daytoy a tawen.
Kinuna ni Mayor Germie Singson-Goulart nga ipadpadarasna ti pannakabangon ti nasao a pinakbet farm tapno maguyugoy dagiti turista agpasiar ditoy nga ili inton Semana Santa.
Segun iti mayora, agkalesa dagiti turista manipud iti Vigan wenno sadino man a pagrubbuatanda a sumrek iti Caoayan ken mapan iti pinakbet farm sadiay Barangay Nansuagao no sadino nga adda nakasagana a pangananda, bayat nga adda cultural show a mangliwliwa kadakuada.
Kinuna ni Goulart a mabalin pay dagiti turista ti agbanniit iti lames nga ituno wenno ipritoda wenno agpuros iti aniaman nga organiko a nateng a napatanor babaen ti tulong ti Department of Agriculture.
Innayonna a maysa daytoy nga income generating project ti gobierno munisipal a mangipaay iti panggedan ken pamastrekan kadagiti lumugar.#