Organiko a taraon, nanginngina ngem nataltalged

Organic a pagay? Organic a natnateng? Ne, umad-adu metten dagiti mangayat kadagitoy a taraon ken mangayat a tumapog itoy kas negosio. Organic farming kunatayo daytoy panangpataud iti taraon nga awan pulos ti naaramat a kemikal ken komersial nga abono. Dagiti organic farmers, agpataudda kadagiti mula a naparukbos ken napadakkel babaen ti kompos ken dadduma a natural a wagas ken nasaluadan dagiti mula kadagiti peste ti talon babaen ti saan a panagaramat kadagiti kemikal.

Umad-adun ti mangayat kadagiti organic foods. Ti salun-at ti dakkel a rason dagiti consumers wenno mangayat kadagiti organic foods. Iti ababa a pannao, panangliklikda kadagiti taraon a kontaminado iti residue dagiti nagduduma a kemikal, kas ti insektisidio, herbisidio, pungisidio, ken dadduma pay a kemikal a pangpaksiat kadagiti makadadael ken agdadael kadagiti immula. Liklikanda ti pannakaidagel ti salun-at. Saluadanda ti salun-at. Ta nagkaadu metten ti tumtumpuar a saksakiten ti bagi kadagitoy a panawen. Maysa kadagiti kangrunaan a makagapu  dagiti taraon nga ipauneg.

Kalaksidan dayta, dagiti organic a natnateng ket nabaknang unay a taudan dagiti essential vitamins a kasapulan unay ti bagi. Taudan met dagiti minerals ken uray ti dietary fiber. Kadagiti dadduma a natnateng ken uray prutas, mas nasigsigurado a magun-od ti kalkalikaguman a medikal ken therapeutic agents a maala kadagiti organic foods ta nakananama a saanda a kontaminado kadagiti taudan dagiti makailuod a sakit.

Organic a pagay? Ket wen man! Iti Cordillera ti kangrunaan a paggapuan dagiti organic a pagay, lalo unay dagiti maimulmula kadagiti uma. Dagiti kadaanan a variety nga adda pay la ibona ken maapit babaen ti rakem ken maibilagda a sibebettek. Makita pay laeng dagitoy a buya iti Cordillera ken daytoy ti paggapuan ti dakkel nga ilgat para export, aglalo iti US ken Europe. Iti Bisaya, adda dagiti sumagmamano nga organic farmers nga agmulmula iti kabarbaro a variety ti pagay. In demand ti organic a pagay. Ngem iti agdama, agkurkurang pay laeng ti suplay itoy.

Apay nga agkurkurang? Wen, gapu ta immadu ti populasion, nasken met nga ibagay dagiti mannalon ti maikanatad nga apitenda, daytay kapkapnekanda la unay. Ta dakdakkel ti maapit ken dakdakkel ti maganansia kadagiti kabaruanan a variety dagiti pagay babaen ti kabaruanan a wagas ti panagtalon.

Basbassit nga agpayso ti maapit iti organic a mula ngem pagpiaanna, nanginngina met nga adayo ti presioda. Organic man a pagay, natnateng ken uray iti prutas. Nanginnginada ta narigrigat ida a taraknen ken saluadan. Nabaybayagda pay a maapit.

Tumaud no kua ti panaggudeng dagiti consumers nga aggatang gapu ta dakkel ti giddiat ti presio wenno nanginngina ti organic a produkto. Ngem kadagiti agkalkalikagum iti kinatalged ken kalidad ti taraonda, saanda a samiren ti presio.

Uray iti poultry a maipakpakat ti free-ranged farming, maibilangda met a kas organically produced gapu iti saan a pannakaaramat kadagiti kemikal. Iti manok, gagangay nga urayenda ti nakainsigudan a panagdakkelda. Gagangay nga urayenda ti sumagmamano a bulan idinto nga iti engineered poultry,  iti 20-25 nga aldaw ket agdagsenen iti 1.2 kilos ti maysa a manok.

Ania kadi ti maiparbeng a maaramid tapno ad-adda pay ti reresgaan dagiti mannalon a mangipakat iti organic farming?

Nasken koma a badangan ti gobierno dagiti mannalon iti produksion, lalona unay iti panagpaadu iti apit. Ipatungpal met a nainget ti alagaden ti Organic Certification Center of the Philippines, ti kakaisuna nga accredited certification body ti Department of Agriculture. Nasken a maipatungpal dagiti annuroten tapno maliklikan dagiti tumaud nga aberia iti merkado, lalo ket kapaliiwan nga adda dagiti mangibagbaga nga organic ti lakoda ngem awan met ti maipakitada a sertipiko a kas pammaneknek nga organiko ti tagilakoda.  Kadagiti certified producers, makita ken mabasa kadagiti nagbungonan dagiti produktoda nga isuda ket lehitimo a producers.

Mapabileg pay koma daytoy nga industria.#