VIGAN CITY  – Kinuna ni Bise Gobernador Deogracias Victor Savellano a saan laeng a dagiti ili no di pay dagiti barangay ket maikkan iti oportunidad a mangitandudo iti pakabigbiganda a produkto a kayatda a parangpayaen.

Imbatad ni Savellano nga adda inisial a tulong nga ited  ti gobierno probinsial kadagiti ili ken barangay tapno maparangpayada ti bukodda a produkto.

Nupay kasta, innayonna a saan koma nga agdepende dagiti barangay iti provincial government no di ket masapul nga adda counterparting tapno agballigi dayta a programa.

Dinakamat ti bise gobernador ti produkto a kalamansi ti Tagudin, partikular ti barangay Saoat a kasapulan a paadduen pay dagiti bumarangay tapno ad-adu pay ti paglakuanda.

“Saantayo koma nga agpatingga lattan iti agdama a mulatayo, masapul a paadduentayo pay,” kinuna ni Savellano idinto nga innayonna a ti puntiria daytoy ket dagiti agparpartuat iti juice manipud iti kalamansi.

No mapaadu dagiti mula a kalamansi, ammon dagiti negosiante no sadino ti papananda paggatangan a direkta, nakuna ti bise gobernador.#