Out of school youth, natiliwan iti paltog iti eskuela

VIGAN CITY – Nakumpiska ti maysa a paltog iti ikut ti out of school youth iti uneg ti maysa a pagadalan ditoy siudad idi bigat ti Marso 28.

Kinumpiska dagiti guardia ti Ilocos Sur National High School ti maysa a cal .22 paltik nga awanan iti bala nga ikut ni Charlie Daquigan y Crusada, 18, saan nga agbasbasa, ken residente iti Barangay San Julian Sur ditoy met laeng siudad.

Sakbayna, nagkuyog da Daquigan ken ni Joshua Russel Baro, 15, ken kalugaranna a simrek iti nasao a pagadalan a nagkalugan iti maysa a motorsiklo ngem bayat ti kaaddada ditoy, nakasubang ni Daquigan ni Brainer Alconis y Rapisura, 18, ken residente iti Barangay 1V, Vigan City.

Mapapati a tinulongan ni Alvin Amano y Arquejo, 15, ken residente iti Barangay IX ni Alconis a nanglugob ken ni Daquigan.

Impan ti guardia dagiti nagriringgor iti guard house ket ditoy a kinumpiskada ti paltog ni Daquigan a nakitada a nakasukbit iti siketna.

Naipan ti suspek iti police station ken tapno maisagana ti maitutop a kaso maikontra kenkuana.#