Oversized a baboy, naan-anayen a naparitan a maiserrek iti Ilocos Sur

VIGAN CITY – Imbilin ti gobernador ditoy probinsia ti naan-anayen a pannakaiparit iti iseserrek dagiti oversized a baboy iti Ilocos Sur.

Imbilin daytoy ni Gov. Luis “Chavit” Singson kalpasan a napatalgedan a kabaelan a suplayan dagiti lokal nga agtartaraken ti kasapulan a karne a baboy iti intero a probinsia.

Sakupen ti pammilin a maparitan a maiserrek ditoy probinsia dagiti baboy nga agdagsen iti nasursurok ngem 100 kilos.

Sakbay daytoy, temporario a napasardeng ti iseserrek dagiti oversized a baboy tapno makita no kabaelan dagiti agtartaraken iti baboy a suplayan dagiti partidor iti partienda a babaoy a mailako kadagiti tiendaan iti probinsia.

Namunganay ti pammilin iti reklamo dagiti agtartaraken iti baboy nga agluglugida gapu iti iseserrek ditoy probinsia dagiti oversized a baboy a nalaklaka ti presioda. #