P.5-M, inted ti gobierno probinsial para kadagiti hog raisers

VIGAN CITY – Nangted ti gobierno probinsial iti P500,000.00 kas suporta kadagiti agtartaraken iti baboy tapno mapadur-as ti panagpatanor kadagiti dingnguen, nangruna iti baboy iti probinsia.

Inyawat ni Governor Ryan Singson ti tseke ti nasao a gatad kadagiti baro nga opisial ti Ilocos Sur Hog Raisers Association nga idadauluan ni dati a Santa Vice Mayor Edgar Tejada bayat ti general assembly a naangay iti Baluarte idi Hulio 25.

Kinuna ni Singson a babaen ti nasao a gatad, manamnama ti pannakapadur-as iti panagpatanor kadagiti dingnguen, nangruna iti baboy, baka ken kalding kas paset iti programa ti seguridad ti taraon ti gobierno probinsial.

Maipalagip a nangted idi ni Governor Luis β€œChavit” Singson iti P1.5 million iti gunglo dagiti agtartaraken iti baboy iti probinsia kas tulongna idi rimsua ti problema gapu iti iseserrek iti probinsia dagiti nalaka ti presioda a baboy manipud iti ruar ti probinsia a pakaibilangan ti Pangasinan, Bulacan ken Pampanga.

Kanaig daytoy, kinuna ni Bokal Pablito Sanidad, Jr., a makatulong ti nasao a gatad tapno maiwayat dagiti ad-adu pay a livelihood projects ti nasao a gunglo kas iti swine dispersal program ti gobierno probinsial.

Indagadag ni Sanidad ti panagridam dagiti hog raisers tapno malapdan ti pannakaipuslit ti botcha wenno hot meat iti Ilocos Sur tapno masaluadan ti salun-at dagiti agindeg iti probinsia.

Nupay adda naipasdek a quarantine checkpoints iti Tagudin ken Sinait, adda latta dagiti mairepreport a maipuslit nga overweight a baboy iti probinsia.

Kabayatanna, kinuna ni Vigan City Slaughterhouse Master Dr. Arnulfo Quitoriano nga adda dagiti maiserserrek a frozen meat iti siudad ngem saanda a maparitan dagitoy agsipud ta kumpleto dagiti dokumentoda.#