P1-M balorna a tulong, naited kadagiti benepisario iti Negokart

CERVANTES, Ilocos Sur – Innem a pulo ket pito a benepisario ti Negosyo sa Kariton (Negokart) program ditoy nga ili ti immawat iti tulong pinansial manipud iti Department of Labor and Employment (DOLE) itay nabiit.

Iti simple a programa, immawat dagiti benepisario iti tulong babaen iti  vending carts, rimiente, ken dadduma pay a material nga usarenda iti negosioda nga agbalor amin iti P1 million.

Kinuna ni DOLE-1 Regional Director Grace Y. Ursua nga agdalan dagiti recipiente iti livelihood program iti ad-adda pay a panagsanay tapno maimatonanda a nasayaat ti pagsapulanda.

Kadagiti agnaed iti Cervantes a benepisario iti Negokart program, 35 ti aglakolako kadagiti makan iti igid ti kalsada, 14 ti aglakolako iti natnateng ken ikan, 9 ti aglakolako iti halohalo ken walo ti aglakolako kadagiti native a kankanen.

Kinuna ni Ursua a naipaay ti Negokart program iti Cervantes babaen ti Bottom-up Budgeting (BUB), maysa a programa a pangpukaw iti kinapanglaw nangruna kadagiti naseksek nga il-ili, kas iti Cervantes.

Maysa ti Cervantes kadagiti upland towns iti Ilocos Sur.#