CABUGAO, Ilocos Sur – Para iti programana iti salun-at, mangilatang ti gobierno munisipal iti P1 milion, segun iti ama ti ili ditoy.
Kinuna ni Mayor Diocaesar Suero a mailatangan ti municipal health office ditoy iti P500,000 manipud iti 20% development fund ken sabali pay a P500,000 manipud iti general fund a maaramat a paggatang kadagiti ag-agas para kadagiti residente ditoy.
Iti pannakipatpatang ni Suero iti media, nadakamatna a prioridadna ti salun-at dagiti kailianna isu a dakkel a gatad ti mailatang para iti pannakagatang dagiti agas.
Naammuan iti mayor a madama ti pannakaadal ti posible a pannakaklasipa dagiti pasiente a maserbian iti municipal health office ditoy.
No mapatuloy, mailako dagiti agas kadagiti maibilang a Class A ken B idinto a maikkan iti diskuento wenno libre dagiti agas kadagiti pasiente a maibilang iti Class C, D ken E.
Kinuna ti mayor a kitkitaenda ti pannakataginayon ti pondo a paggatang iti agas, isu a maurnong dagiti reseta tapno maammuan dagiti rummuar nga agas.#