P100 Million financial assistance para kadagiti mannalon, ipaay ti DA

Cong. Deogracias Victor Savellano

VIGAN CITY – Inaprobaranen ti Department of Agriculture ti P100 Million financial assistance a maipautang iti nababa a porsiento kadagiti mannalon nangruna dagiti agmulmula iti bawang ken lasona iti Ilocos Sur tapno masalbar ti agngangabiten nga industria iti probinsia.

Dayta ti inrakurak ni Ilocos Sur 1st District Congressman Deogracias Victor Savellano kadagiti miembro ti Ilocos Sur Integrated Press a nakikuman kenkuana kabayatan ti naangay a Kapihan iti Amianan Media Forum.

Inrakurak ni Rep. Savellano nga inaprobaranen ti DA ti financial assistance a maipautang kadagiti mannalon iti nababa nga interes ken mabayadan kalpasan ti pannakailako dagiti produktoda a bawang wenno lasona. Impakaammona a naruk-atanen itay pay 2018 ti P20 Million a naitalek iti Nueva Segovia Consortium of Cooperatives a mangipautang kadagiti mannalon.

Inlawlawagna a nasken ti nalag-an a pautang kadagiti agmula iti bawang ken lasona tapno matulongan ken maparegtada nga agmula kadagitoy a produkto ta bumasbassiten dagiti agmulmula ken maap-apit gapu ti kurang a suporta ti gobierno ken panagadu dagiti imported a produkto. Impalagipna nga itay 2018 ket timmayok ti presio ti bawang gapu ti kinakurang ti lokal a produksion, ket iti naangay nga imbestigasion ti Committee on Agriculture iti Kongreso, naduktalan a kasapulan ti pannakaparegta daytoy nga industria iti agrikultura tapno matulongan ken maparegta dagiti agmulmula iti bawang ken lasona nangruna iti Ilocos Sur.

Impakaammona nga agtultuloy ti panangipaay ti opisinana kadagiti branded a traktora, generators ken dadduma pay a farm machineries kadagiti mannalon a kameng dagiti farmers’ association a rehistrado iti Securities and Exchange Commission. Inlawlawagna a dagiti pondo para kadagitoy a proyekto ket nagtaud iti DA ken dadduma pay a mainaig nga ahensia, ken nagun-od babaen ti panagsukisokna. Impakaammona a dagiti congressional share-na iti pondo manipud iti Republic Act 7171, ket naitiponen iti municipal share dagiti lima a munisipio nga agmulmula iti tabako a birhinia, iti ili a Sinait, Cabugao, San Juan, Magsingal ken Santo Domingo.

Inawisna dagiti mannalon iti Umuna a Distrito a mangbukelda iti asosasionda ken iparehistroda iti SEC, ket mangaramidda iti resolusion nga idatagda kenkuana, tapno matulonganna ida kadagiti kidkiddawenda. Inlawlawagna a nasken a nakarehistro iti SEC dagiti farmers’ association a maipaayan iti tulong ta naingeten dagiti pagallagadan manipud iti napasamak dagiti kontrobersia a naipaay dagiti adu pondo ti gobierno para kadagiti saan a pudno nga asosasion dagiti mannalon.

Inrakurakna pay a nalpasen ti Small Reservoir Impounding Project ti opisinana nga insayangkat ti National Irrigation Administration sadiay Barbar, San Juan, ken malmalpasen ti Gaco SRIP iti Cabugao. Inlawlawagna nga ipangpangruna a tulongan ti opisinana ti benneg ti agrikultura ta dagiti mannalon ti kadakkelan a sektor iti probinsia. Impakammo pay ni Rep. Savellano a mainayon kadagiti proyektona iti agrikultura, agtultuloy met dagiti programa ti opisinana iti edukasion babaen kadagiti scholarship grants ti Commission on Higher Education ken Technical Education Skills and Development Authority; ken nagduduma a social services, tourism ken infrastructure projects. (Eden Alviar)