P100,000 groseria, naited kadagiti soldado

SAN JUAN, Ilocos Sur –  Agduduma a groseria ti naited itay nabiit kadagiti soldado  a nakabase iti maysa a barangay itoy nga ili tapno adda nayon ti masapulan.

Naited ti P100,000 ti pategna nga agduduma a grocery goods kadagiti soldado a kameng ti 50th Infantry Batallion ti Philippine Army a nakabase iti Barangay Immayos itoy nga ili idi Marso 14 kas paset ti programa ni Gob. Deogracias Victor “DV” Savellano a Developing Ventures for Brigade Soldiers (DVBS), Panindang Handog ni Gov DV.

Segun iti gobernador, tulong daytoy ti provincial government tapno maaddaan iti nayon a pagsapulan dagiti soldado ken pamilia dagitoy ken panangipakitana  iti panangipategna kadagiti soldado nga agsaksakripisio para iti pannakatagiben ti linak iti probinsia.

Kinuna ni Savellano a mangnamnama a mapadakkel dagiti soldado ti nasao a tulong.

Pinagyamanan met ni Lt. Col. Roy De Vesa, Commanding Officer ti 50th IB daytoy a tulong a naipaay kadagiti kasoldaduan. Impanamnamana a parang-ayenda daytoy a naited kadakuada.

Kinuna ni Savellano a sumaruno a maikkan iti panindang handog ti 503rd Infantry Brigade a nakabase iti Sulvec, Narvacan. (Mancielito S. Tacadena/NBN Vigan)