P100,000 gunggona makaited impormasion naghold-ap iti payroll

QUIRINO, Ilocos Sur – Nangitanggaya ti lokal a gobierno ditoy iti kuarta a gunggona iti asinoman a makaited iti impormasion para iti pannakatiliw dagiti naghold-ap iti sueldo dagiti empleado ti munisipio ditoy nga ili.

Kinuna ni Mayor Cliffor Patil-ao a napagtitinonganda ti pannakaitanggaya ti P100,000.00 a gunggona bayat ti naaramid a kumperensia dagiti kameng ti sangguniang bayan, dagiti empleado ti munisipio, dagiti kameng ti PNP, ken ti opisinana.

Innayon ti mayor a nagur-orda iti pondo para iti nasao a gunggona tapno matiliw dagiti nagisayangkat iti panaghold-ap iti payroll para iti bonus dagiti empleado.

Idi sardam ti Disiembre 26, 2012, sinaneb dagiti armado a lallaki ti Mitsubishi Pajero a nagluganan dagiti empleado ti munisipio ti Quirino a pakaibilangan da Alejandro Sevilla y Galut, 54, tesorero ti munisipio; Lilia Luisa Sevilla y Gallao, 54, naasawaan, municipal social welfare and development officer; Erwin Bautista y Abejon, 34, naasawaan, utility worker; ken Leonardo Betonio y Abejon, 26, baro, clerk, agpapadada amin a residente iti Barangay Poblacion ti nasao nga ili ket  kinasakasda ti P1,980,750.00 a para iti extra bonus dagiti empleado, agraman dagiti petaka, selpon, ken ti lisensiado a cal. 9mm ti drayber.

Iti panagimbestiga dagiti polis iti babaen ti direkta a superbision ni PSI Sosimo Reyes, hepe ti polis, naggapu dagiti biktima manipud iti Candon City a nangiruaranda iti nasao a gatad a para iti extra bonus dagiti empleado ti munisipio ket bayat ti panagdaliasat ti Mitshubishi Pajero a naglugananda a minaneho ni Alejandro Sevilla iti Sitio Baybayatin, kellaat a nagparang manipud iti bakras dagiti armado a grupo ti lallaki a nagtagiarmas ket pinasardengda ti lugan,   indeklarada ti hold-ap, sada ginuyod nga inruar dagiti naglugan ken innala dagiti petaka ken selponda, ken ti P1,980,750.00 a para iti extra bonus dagiti empleado ti munisipio agraman ti paltog ti drayber..

Maysa kadagiti biktima, ni Leonardo Wandas, ti nakalibas ket nakikalugan iti maysa a dyipni a nagpa-Poblacion sana inreport ti pannakahold-apda.

Nagresponde dagiti polis ket nangiwayatda iti manhunt operation maikontra kadagiti naghold-ap ngem saandan a nakita pay dagitoy.

Kinuna ni Patil-ao a nayonanda tunggal innem a bulan ti maitanggaya a gunggona no awan latta ti resultana.

Impasingked pay ti mayor a no boluntario a sumuko ti asinoman kadagiti suspek ken makaited iti impormasion mainaig iti pannakasolbar iti panaghold-ap, mapakawan ti sungsungbatanna iti linteg ken maited pay kenkuana ti naitanggaya a gunggona.

Daytoy ti umuna a gundaway a mahold-ap ti payrol dagiti empleado ti lokal a gobierno  iti Quirino.#