SINAIT, Ilocos Sur -Agdagup iti P120,000 a kuarta ken alahas ti natakaw iti balay ti maysa a balo sadiay Barangay Calingayan ditoy nga ili a mapapati a naisayangkat idi rabii ti Pebrero 12.
Nagreport ni Estrella Tomoro y Yago, 63, balo, ken residente iti nadakamat a barangay a natakaw iti balayna ti P100,000.00 a kuartana ken maysa a singsing, bracelet ken maysa paris nga aritos nga agdagup iti P20,000.00.
Segun iti biktima, saan a nasukalan dagiti mannanakaw ti bracelet ken kuentas agraman ti play station portable ken Game Boy ken personal a sanikuana.
Iti panagimbestiga dagiti polis, pinanawan ni Tomoro ti balayna idi Pebrero 10 gapu ta napan idiay Manabo, Abra, kaduana ti kaanakanna a ni Mark Lester Yagoy Mariano.
Mapapati nga idi rabii ti Pebrero, nakita dagiti kaarruba ti biktima a nakalukat ti balayna.
Idi tengnga ti rabii ti Pebrero 12, simmangpet da Mark Lester Yago ken maysa a kaduana ket kaduada dagiti kaarruba a simrekiti balay ti biktima tapno kitaenda no adda napukaw ngem mapapati nga awan met.
Idi simmangpet ti bikima iti agarup 9:00 ti rabii ti Pebrero 12, naduktalanna a naporsar a naluktan ti likud a ridaw ti balay ken nadadael ti padlock.
Naduktalan laengen ti biktima nga awanen ti kuartana a P100,000 ken sumagmamano nga alahasna.
Madama ti panagimbestiga dagiti polis mainaig iti nasao a panagtakaw.
Kabayatanna, imbilin ni Provincial Director PSSupt. Noel B. Amoyen ti naing-inget pay a panag-checkpoint iti sanguanan dagiti mapaspasamak a panagtakaw iti probinsia.
Imbilin ni Amoyen ti pannakaipasdek iti “Checkpoint Sapasap” kadagiti nadumaduma nga ili ti probinsia tapno malapdan ti panagtakawan kadagiti pagtaengan iti probinsia.
Segun iti provincial director, paset ti police integrated patrol system ti “Checkpoint Sapasap” ket maipangruna ti pannakasitar dagiti agdaliasat a mapagduaduaan a lugan nangruna iti adalemen a rabii ken iti pannakatunton ti getaway vehicle dagiti nagisayangkat iti panagtakaw kadagiti pagtaengan itay nabiit.
Idi Enero 13, sinerrek dagiti armado a mannanakaw ti balay ti maysa a retirado a mangisursuro sadiay Barangay Imus, Santiago, Ilocos Sur, pinungoda dagiti bumalay sada intaray ti 400 Euro nga agbalor iti P30,000, assorted nga alahas nga agpateg iti P100,000, Sony Ipod, laptop, 6 a selpon, ID ken tultulbek.
Natakawan met ti balay ti maysa a balikbayan idiay Barangay Paing idi Enero 14 ket kinasakasda dagiti cash money nga agdagup iti P145,000; 660 pounds, assorted nga alahas ken napapateg a sanikua nga ag-balor amin iti P207,500.00.
Idi Enero 29, sinerrek dagiti mannanakaw ti balay ti agassawa nga abogado sadiay Barangay Parada, Sto. Domingo, Ilocos Sur ket kinurimesda ti maysa a laptop, Olympus camera, P20,000,00 cash, lisensiado a cal 9 mm pistol nga agpateg iti P45,000.00 ken ti kuarta ti abogada a P5,000.00 ken dadduma pay a personal a belongings.
Idi Pebrero 7, natakawan ti balay ti sabali pay a balikbayan ket kinasakasda ti maysa a flat screen TV 32″ LG nga agpateg iti P42,000.00; 2 unit ti LG home theaters system nga agbalor iti P30,000.00; maysa a laptop Acer nga agpateg iti P28,000; agduduma a lupot, sapsapatos, ken sandals nga agbalor amin iti P15,000.00; agduduma nga alahas nga agpateg amin iti sumurok kumurang a P80,000.00; leather bag ‘Coach’ nga agpateg iti P20,000.00 a naglaon iti United States issued Alien ID, State ID, Social Security System ID (SSS) ken P2,000 pesos cash; 2 a selpon nga agbalor iti P15,000.00; ken 5 boxes ti bangbanglo nga agpateg iti P10,000.00.
Nabigbig ti biktima dagiti tallo kadagiti suspek iti panagtakaw ket tiniliw ida dagiti polis Vigan iti sanguanan ti maysa a pagtagilakuan iti siudad.#
