P105/kilo presio ti baboy, napagtinongan meat vendors, traders

VIGAN CITY – Nagsinnabat met laeng dagiti meat vendors ken hog raisers iti presio ti mailako a baboy ditoy probinsia bayat ti dialogo iti nagbaetanda a naangay iti Baluarte ditoy siudad idi Hulio 8.

Napagtinongan dagiti dua a grupo a P105 kada kilo ti presio ti baboy  ngem masapul a saan a nakurkurang ngem 85 kilos ti kadagsen ti mailako a liveweight a baboy.

Napaayaban iti maysa a dialogo dagiti aggatgatang ti baboy ken dagiti agtartaraken iti daytoy a dingnguen iti Baluarte ditoy babaen ti ibaballaet ni Gov. Luis “Chavit” Singson gapu iti mapapati a panagkurang ti suplay ti baboy iti probinsia.

Reklamo dagiti aggatgatang iti baboy iti gobernador a makaadayoda payen kadagiti naseksek a lugar iti probinsia nga agbirok iti gatangenda a baboy ngem nakisang ti magatangda.

Iti sabali a bangir, impetteng ni Juliet Seguban, opisial ti Ilocos Sur Hog Raisers Association nga adda umdas a suplay ket no agsursor dagiti agparparti iti baboy ket sigurado nga adda magatangda.

Sakbayna, impetteng dagiti agtartaraken iti baboy a P110 kada kilo ti panaglakoda iti liveweight ngem insungbat dagiti meat vendors a saanda a kabaelan ti presio ta aglugida gapu iti adu a mabusbosda iti pannakaparti dagiti baboy sakbay a mailakoda iti tiendaan.

Bayat ti dialogo, impaganetget ni Singson a dina kayat a maysa laeng a grupo ti agbiag wenno mairanud ket kasapulan a  mabalanse ti panagtaraknan ken panaglakuan ti baboy gapu ta sigurado a ti publiko nga aggatgatang iti karne ti maapektaran no adda problema iti industria.

Kanaig daytoy, nangipaay ni Singson ti sag-P1.5 million iti grupo dagiti meat vendors ken hog raisers.

Segun kadagiti meat vendors, igatangda ti kuarta ti truck a mausar a pagbunag kadagiti gatangenda a baboy idinto nga iti biang dagiti hog raisers, maigatang daytoy kadagiti burias a maiwaras kadagiti mayat nga agtaraken.

Immun-una ngem daytoy, nangipaulog ti gobernador iti Executive Order a mangipawil iti pannakaiserrek iti Ilocos Sur dagiti oversized a baboy nga aggapu manipud iti sabali a probinsia, kas iti Pangasinan ken Bulacan.

Daytoy ti addang nga inwayat ni Singson kalpasan nga indanon kenkuana dagiti agtartaraken iti baboy ti panagpukawda gapu iti iseserrek ditoy probinsia dagiti nalaka nga oversized a baboy.

Maibilang nga oversized ti maysa a baboy no agdagsen daytoy iti nasursurok ngem 100 kilos.

Kiniddaw pay ti gobernador ti tulong ti media nga agmonitor no agpayso nga agkurkurang ti suplay ti baboy iti probinsia kas ibagbaga dagiti aggatgatang iti baboy ngem pinaglibakan met dagiti hog traders.#