SINAIT, Ilocos Sur – Kasungani ti ninamnama dagiti agmulmula iti tabako, saan a napatgan ti kiddawda a ngumatuan ti floor price ti tabako a masurot iti masungad a panagtatabako.
Sakbay ti tripartite meeting a naangay iti nagbabaetan dagiti mannalon ken dagiti tobacco manufacturers and traders, napagtitinongan dagiti grupo dagiti mannalon iti Ilocos Sur ti panangdawatda a matuonan ti floor price daytoy a produkto iti P11.00.
Segun ken ni Sangguniang Bayan Member Bernard Vicente, maysa kadagiti lider dagiti mannalon a taga-ditoy nga ili, ti nagkuna a kalpasan a nakontarda ti projected a paglakuanda iti apitda a tabako nga agdagup iti P140,000 per hectare, sada ikissay iti naglakuanda idi napalabas a tawen ken pannaka-bingay ti apitda a P1,850 per hectare ket nagtungpal a P11.09 ti rumbeng a maituon iti floor price daytoy a produkto.
Ngem manipud iti P11.00, nagbalin laeng a P6.00 ti naituon a floor price ti tabako para iti masungad a panagtatabako.
Agbalinto ngarud a P78.00 ti floor price dagiti dekalidad a tabako idinto a matuonan iti P40.00 ti floor price ti reject.
Ngem nupay di napatgan ti kiddawda, sumagmamano a mannalon ti nagkuna a nasaysayaat la daytoyen ngem ti awan a pulos ti maituon iti floor price ti tabako.#