P11-M dinadael ni Bagyo Juan iti agrikultura

BANTAY, Ilocos Sur – Umabot iti P11,800,000 ti nadadael iti benneg ti agrikultura ditoy Ilocos Sur iti iduduprak ni Bagyo Juan, daytoy ti impalgak ti provincial agriculturist.

Kinuna ni Teofilo Quintal, provincial agriculturist, bayat ti eksklusibo a pannakiuman kenkuana ti Around Ilocandia Channel idi Nobiembre 4 nga  agdagup iti P6,800,000 ti nadadael iti produksion ti pagay a kaadduanna ti naregreg gapu iti napigsa nga angin; P4 milion iti fisheries ken P1 milion iti nadumaduma a natnateng.

Kinuna ni Quintal a mabalin a manayonan pay ti damages apaman a sumangpet ti report manipud kadagiti sumagmamano pay a munisipio ditoy probinsia.

Innayon ni Quintal a bassit laeng ti porsiento ti nadadael isu a saan unay a naapektaran dagiti mannalon.

Inwaragawag pay ti provincial agriculturist ti posible a pannakaisubli manen ti puraw a balitok iti Ilokandia.

Kinunana nga adda interesado a gumatang iti produkto a kapas isu nga inkomit ti gobernador ti 200 nga ektaria a mamulaan iti kapas.

“Kayat ni Gov. Chavit nga adda alternatibo a maimula dagiti mannalon a saan a makamula iti tabako gapu ta salty ti talonda ket napanunotna a mai-revive ti produktotayo a kapas,” kinuna ni Quintal sana innayon a kitkitaenda dagiti talon iti Siudad ti Candon ken ili ti San Juan a pakaimulaan ti kapas.

“Positibo ni Mr. Gilan, ti Israeli a kapatpatangmi ken ni Gov. Chavit ket inkarina a gatangenna amin a produkto a kapas ken mangipaay pay iti bassit a ginnery a pakaiprosesuan ti kapas,” kinuna pay ti provincial agriculturist.

Maipalagip a natay ti industria ti kapas idi ngalay ti dekada 80 a nakaigapuan ti saanen a pannakausar ti ginnery a naipasdek iti Labnig, San Juan. Napagbalinen a BArang-ay demofarm ti sigud a nagdissuan ti ginnery.#