P12-M pategna a mula a marihuana, napag-ut, napuoran

SUGPON, Ilocos Sur – Sumagmamano a plantasion ti marihuana a masarakan iti Barangay Licungan ditoy nga ili ti rinaut dagiti operatiba idi agsapa ti Enero 29 ket pinag-ut ken pinuoranda dagiti matartaraken a mula kadagitoy a lugar.

Segun iti report, nasurok tallo oras a nagnagna dagiti nagtitipon nga elemento ti kapolisan a pakaibilangan ti PDEA RO-1, RPSB PRO 1, RID-PRO 1 (RA ISUR), ISPAIDSOTG ken ti police station ti Sugpon manipud iti Barangay Poblacion agingga iti nadakamat a barangay a pakasarakan kadagiti plantasion a puntiria a pakaisayangkatan iti marihuana eradication.
Agdagup iti 60,600 a fully grown a marihuana ken seedlings ti pinag-ot ti grupo malaksid laeng ti 30 kilos a napagango a bulong ti marihuana a dinadaelda a mapattapatta nga agbalor amin iti P12,486,000.00.

Naammuan ti Tawid News a nadumaduma a plantasion ti nakapag-otan dagiti mula a marihuana a mapattapatta a 6,950 metro kuadrado ti kadagupan a kalawada.

Kalpasan ti pannakainbentario dagiti napag-ot a mula a marihuana babaen ti maysa a kameng ti PDEA, nadadael ken napuoran dagitoy.

Awan ti naaresto a tao iti pannakaisayangkat ti operasion.

Tinawen a mangiwayat ti kapolisan iti marihuana eradication iti kabambantayan a paset ti Sugpon, partikular iti lugar a pagbeddengan daytoy nga ili ken iti Benguet.#