P1.3-M a ramit-pagkalap, naiwaras iti 10 ili

Vigan City- Sangapulo nga ili ti winarasan ti provincial government  iti gillnets (sigay) itay nabiit para iti pamastrekan dagiti mangngalap iti probinsia.

Naiwaras dagiti gillnets nga agpateg iti P1.3 milion para kadagiti mangngalap iti  Tagudin, Cabugao, Santiago, San Esteban, Sta. Maria, Narvacan, Santa, San Vicente, Sinait, ken  Caoayan bayat ti naangay a turn-over ceremony ti fishery livelihood project ti provincial government a naangay iti sango ti kapitolio ditoy itay Abril 8.

Kinuna ni Gob. Deogracias Victor “DV” Savellano a rugi laeng daytoy ti panagiwarasda iti ad-adu pay a livelihood projects para kadagiti adda iti sektor ti agkalkalap.

“Babaen ti counterparting, ad-adu ti maiwarastayo ken ad-adu ti mabenepisiaran a kaprobinsiaan, kinuna ni Savellano. (Mancielito S. Tacadena/ NBN Vigan)