P2-M hydraulic cutter expander, ginatang ti gob prob’l

VIGAN CITY – Gimmatang ti gobierno probinsial iti equipment a mausar no adda dumteng nga emerhensia a pagkasapulan maigapu iti didigra kas iti layus, bagyo, uram wenno aksidente, daytoy ti impalgak ni Gov. Ryan Singson itay nabiit.

Kinuna ni Singson a gimmatang ti gobierno probinsial iti hydraulic cutter expander a mausar no adda biktima dagitgi sumangbay a didigra kas iti aksidente iti lugan a maipit ken saan a makaruar ti biktima.

Agbalor ti nasao a ramit iti P2 milion ket kabaelan daytoy a kartiben aniaman ti klasena a landok wenno napuskol a metal tapno maispal ti biktima a maipit iti aksidente wenno aniaman a didigra.

Naipaima ti nasao a ramit ken ni PDRRM head Michael Chan ngem kinuna ni Singson a nakasagana ti gobierno probinsial a mangipabulod iti daytoy kadagiti LGU, polis ken dadduma pay nga ahensia para kadagiti emerhensia a pasamak.#