BANNER: P2-M pategna a masuspetsa a shabu, nakumpiska, 18 naaresto, iti OTBT operation

SAN FERNANDO CITY – Nakaiskor ti kapolisan iti Region 1 iti napinget a kampaniana maikontra iti illegal a droga iti pannakakumpiska ti sumurok kumurang P2 million ti balorna a masuspetsa a shabu ken pannakatiliw iti 18 a tattao a mapapati a nainbolbar iti panaglakuan iti maiparparit a droga sadiay Sitio Silungan, Bonuan Binloc, Dagupan City idi October 22.

Iti report manipud Police Regional Office 1, kinuna ni Regional Director Police Chief Superintendent Ericson T. Velasquez nga inwayat dagiti nagtitipon nga operatiba iti panangidaulo ni Police Superintendent Christopher N. Abrahano, hepe ti polis iti Dagupan City, ti panagsukisok iti residente dagiti masuspetsa a drug personalities babaen ti bileg ti Search Warrant Numbers 2015-007-D agingga iti 2015-12-D nga inyisio ni Judge Caridad V. Galvez iti Regional Trial Court Branch 43.

Malaksid iti Dagupan City police station, karaman iti operasion dagiti operatiba manipud iti Philippine Drug Enforcement Agency-Regional Office 1 (PDEA-RO1), Regional Intelligence Division ti PRO1, Provincial Intelligence Branch ti Pangasinan Police Provincial Office, Pangasinan Provincial Public Safety Company, Regional Public Safety Battalion 1 (RPSB1), Criminal Investigation and Detection Group 1 (CIDG1), Regional Intelligence Unit 1 (RIU1), Land Transportation Office, PNP Maritime Group ken Coast Guard.

Inaresto dagiti operatiba dagiti nainagan iti search warrant a pakaibilangan da Ferdinand G. Decena, 47, naasawaan; Mohammad P. Sumaguina, 33, naasawaan; Fermin C. Decena, 25, baro; Princess C. Decena, 24; Raihana G. Pangandang, 23, baro; Regine C. Magsano, 21, naasawaan; Namraida S. Panganting, 20, naasawaan, ken dua a menor de edad.

Siam pay a tattao ti naaresto bayat ti operasion ket nabigbig dagitoy a da Noralyn A. Musor, 20, awanan asawa; Jenny Ann M. Magsano, 20, awanan asawa; Mohamad M. Macabanaw, 33, naasawaan; Rohaida P. Nasdin, 23, naasawaan; Enoc D. Ontong, 42, naasawaan; Pinda B. Canter, 40, naasawaan; Sadik P. Sumaguina, 18, naasawaan; Asgar L. Baguinda, 26, naasawaan; ken maysa a menor de edad.

Naaresto ni Baguinda babaen iti bileg ti maysa a warrant of arrest.

Kinuna ni Velasquez a nakakumpiska dagiti operatiba iti 309 grams a masuspetsa a shabu a mapattapatta nga agbalor iti P2,008,500.00, kuarta nga agdagup iti P122,955.00 ken 6 nga awanan dokumento a motorsiklo.

Naiwayat ti panagsukisok iti natalna a wagas ken sinaksian dagiti barangay officials, media ken pannakabagi ti Department of Justice.
Naipan dagiti natiliw ken nakumpiska iti Dagupan City police station para iti umisu a disposision ken dokumentasion.

Iti pannakaisurat daytoy, maisagsagana metten dagiti maikanatad a kaso maikontra kadagiti suspek.

Kinuna ni Velasquez nga agtultuloy latta ti kampania ti kapolisan iti rehion maikontra iti droga ket impatalgedna nga ad-adu pay a drug personalities ti matiliw babaen ti implementasion ti β€œOne Time Big Time (OTBT)” operations.”