P20.3-M naited 13,563 indigent senior citizens iti Region 1

VIGAN CITY – Agdagup iti P20,344,500 ti alawans a rinuk-atan ti Department of Social Welfare and Development (DSWD) iti Region 1 babaen ti Social Pension Program (SPP) para kadagiti 13,563 nga indigent senior citizens iti Region 1, a mangsaklaw iti umuna a tallo a bulan daytoy a tawen.

Kinuna ni DSWD Region 1 Information Officer Iryn Q. de los Reyes a tunggal social pensioner ket immawat iti P1,500 wenno P500 tunggal bulan, kas stipend para iti bulan ti Enero agingga iti Marso tapno adda busbosenda para iti inaldaw a kasapulanda iti taraon ken medisina.

Kinunana a naruk-atan daytoy nga stipend a mangsaklaw iti 121 a munisipalidad a nakumpleto iti las-ud ti 17 nga aldaw, a nakaaramatan dagiti regular  staff a naituding a mangiwaras kadagiti stipend iti babaen ti liderato ni DSWD Regional Director Marcelo Nicomedes J. Castillo.

Nupay kasta, adda 185 a social pensioners a saan a nakatabuno iti naiskediul a pannakaiwaras dagiti stipend agsipud iti saan a napakpakadaan a pasamak ken estadoda ti salun-at.

Kanaig daytoy, nakikoordinar ti Regional Social Pension Unit kadagiti maseknan nga empleado kadagiti LGUs tapno mapakaammuan dagiti di nabayadan a pensioner ken maire-iskediul ti pannakaruk-at ti stipendda.

Iti sumagmamano a kaso, binisita dagiti DSWD ken LGU social workers dagiti naidalit ken nakapsut a senior citizens para iti pannakaited dagiti stipendda.

Kinuna ni de los Santos a dagiti indigent senior citizens a sinaklaw daytoy a programa ket dagiti agtawen iti 77 ken agpangato, nakapsut, masaksakit, ken addaan disability, awanan iti regular a pagtaudan iti pamastrekan ken wenno suporta manipud iti aniaman a kameng ti pamilia, saan nga umaw-awat iti sabali a benepisio ti pension manipud iti gobierno wenno pribado nga ahensia, ken nakalista iti National Household Targeting System for Poverty Reduction ti DSWD.

Kinuna pay ni de los Santos a mabalin pay laeng nga alaen dagiti kabagian ti natay a senior citizen ti stipend daytoy uray no pimmusayen a nasapsapa ngem iti cut-off date (tunggal maika-25 ti bulan). Sakbayna, maala laeng dagiti kabagian ti natay a pensioner ti stipend daytoy no pimmusay iti kaaldawan wenno kalpasan ti cut-off date. (Freddie G. Lazaro, PIA/Vigan City)