P200-K gunggona makaited impormasion pimmatay iti Konsehal ti Magsingal

MAGSINGAL, Ilocos Sur – Nangitanggaya ti lokal a gobierno ditoy nga ili iti P200,000.00 a gunggona iti asinoman a makaited iti impormasion iti kinasiasino dagiti pimmatay ken ni Konsehal Freddy Arquero y Rita-Rita.

Pinaltogan dagiti armado a lalaki a nakalugan iti motorsiklo idi agarup 5:40 ti agsapa ti Nobiembre 13 ni Arquero, 55, balo, ken residente iti Barangay San Lucas ditoy nga ili bayat ti panagdaliasatna a nakalugan iti nangisit a Yamaha Sniper a motorsiklona iti national highway a sakup ti Barangay San Basilio.

Mapapati nga idi nakagteng ni Arquero iti national highway, nagpakannigid nga agpaabagatan ket ditoy a sinurot dagiti di nabigbig a suspek a naglugan iti di nabigbig a motorsiklo ket pinaltogan ti maysa ti biktima a puon ti nakaikrasanna.

Nagsagrap ni Arquero iti tallo a gunshot wounds iti likud ken makannigid a paset ti bagina.

Immuna a naitaray ni Arquero iti Magsingal District Hospital babaen dagiti nagresponde a polis sa naiyalis iti Northside Doctors Hospital, Guimod, Bantay, Ilocos Sur ngem pimmusay idi agarup alas siete iti dayta met laeng a bigat bayat ti pannakaoperarna.

Dagus a nangipatulod ti kapolisan ditoy nga ili iti flash alarm ken pannakaiwayat iti dragnet operation maikontra dagiti naglibas a di nabigbig a kriminal ngem negatibo ti resultana.

Mapapati a calibre 45 ti naaramat iti pammaltog kas maibatay iti lima a kapsula ken dua a deformed slug a narekobre ti SOCO team iti nakapasamakan iti krimen.

Iti inisial a resulta ti naisayangkat nga autopsia iti bangkay ni Arquero babaen ken ni Police Supt. Nerino B. Daciego, MD-RCLO, PRO1, natay ti biktima gapu iti hemorrhagic shock secondary to multiple gunshot wounds.

Naipan dagiti dua nga slug a narekobre iti bagi ni Arquero  iti Police Crime Laboratory Office iti probinsia para iti ballistics examination.

Kanaig daytoy, nabuangay ti Special Investigation Task Group Arquero a mangiwayat iti in-depth investigation mainaig iti pannakapapatay ti konsehal. (Tawid News)